Hilekoa, gizartearen txotxongiloa. 3/3

Atalak: Gorputza

Hilekoaren inguruko saga honetan aurrera, mamuak maindire zuriz mozorrotutako txotxongiloak besterik ez direla sinetsi arte. Ez daukat gorriz zikintzeko beldurrik.

“Ilargia zugan. Ondoegi gordetako sekretua” bideoko azken posta. Hor nonbait isilpean nuena ozen esan edo idaztean sentitu naiz aske, sekretua azaleratzean. 

“Ilusioz eta beldurrez ezagutu zintudan”,  “emakume naiz zurekin”, “nola naizen nire gorputzaren menpeko”, “ikasi dut nirekin behar zaitudala”, “ez dakizu zuri esker zenbat ikasi dudan!”. Lehen artikuluan Ainhizek proposatutako bideotik ateratako esaldiak dira, hilekoa gaitzat harturik emakume bertsolari gazteek egindako ekarpena. “Zergatik dugu mina bizitzaren oinarri?”. Eskerrik asko Ainhize.

Hilekoarekin sentitzen ditugun gauza guztien artean mina da kontrolatzen zailena, baina ez ezinezkoa. Dokumentalean, hainbat adituk hura kontrolatu eta gainditzeko aholkuak eman dituzte, garuna baita gure min guztien oinarri.

Zer gertatzen da obulazioarekin? Nola aldatzen du jendearen animo psikologikoa?

Hilekoak ez liguke trastornorik eragin behar. Bizi garenokin eta bereziki gure buruarekin armonian bizitzen ikasi behar dugu. Ez izan gupida eta egun horiek filosofiaz onartu zure irri polit hori berreskuratu arte. Baina, emakume oso gutxik dakite noiz ari diren obulatzen. Gorputza ezagutu eta eskatzen duena emango bagenio, errazago lagun geniezaioke.

“Zaila da positiboa izatea sufritzen ari bazara”, dio Alexandra Pope psicoterapeutak, “zikloa baloratzen ez dakigulako izan daiteke”. Zikloa onartu eta kontrolatzen hastean konturatzen gara positiboagoak izan gaitezkeela, guk ere badakigulako nondik jo. Osasungarria eta garrantzitsua da konturatzea guretzat denbora behar dugula orain, eta noski, denbora eskaintzea. Horrek, gainera, sintomak eta estresa gutxiagotuko ditu. Estresa baita osasun gaien atzean dagoen arrazoi nagusienetako bat. Emakumeak estresatuta bagaude, hilekoan eragingo digu, hura baita alderdirik sentikorrena gugan.

Nola gainditu, beraz, mina?

Organismoa estimulatua izateak, hilerokoaren mina baretu dezake eta osasungarriago sentiarazi. Bularrek, adibidez, mugimendua behar dute. Bizitzako energiaren eta indarraren ontziak dira. Masajeak ematean (bularretan) energia hori zugana itzultzea lor daiteke. Ormonetan eragina izango du horrek eta ziklo menstruala aldatuko du. Odol asko bota eta energia galduz gero, bularrak igurztea komeni da. Gure gorputzarekin sintonian eta gozatzen baretuko dugu mina.

Min fisikoa ezin kontrola daitekeela, beraz, ez da guztiz egia, garunean baitaukagu trastornorik handiena. Horregatik lehen erremedioa izango litzakeen pilula hartu baino lehen pentsatu bi aldiz eta aditu hauen aholkuak jarraitu:

Victoria Agudo ginekologoa: minaren aurreko erremediorik onena masturbatzea da. Kitzikapena dagoenean, odolaren pilaketa bat gauzatzen da eta bulbako ezpainak eta klitoria handitu egiten dira. Orgasmo bat izatean, odola liberatu egiten da eta pelbisa askeago sentitzen dugu. Pilaketa horrek  mina areagotzea eragin dezake. Asetze sexual hori bikotean zein bakarrik eragin eta senti daiteke. Hortaz, pilula bat hartu aurretik masturbatzeko animatzen du ginekologo honek. Osasungarriagoa da, mina arindu dezake eta pilulak baino hobe sentiaraziko zaitu.

Kaleko emakume bat bere esperientzia propioaz: Hasieran mingarria zela uste nuen, baina aztertu ondoren, oso arlo dinamikoa bihurtu da nire bizitzarako: garrantzitsua, sexuala, ameslaria, askatzailea eta espirituala. Goitik beherako pertsona bat nintzela sentitzen dut, hilekoa nire bizitzan ezinbestekoa delako.

Beste emakume baten testigantza: Alabarekin eta nire buruarekin gehiago konektatzea lortu dut. Mina? Batzuetan besteetan baino gehiago, baina ez dut minik izaten. Dantzan jarraitu beharko dut.

Penelope Shuttle poeta: Erditzeko mina bezalakoa izan daiteke hilekoak sentiarazten duena batzuetan. Baina, gure bizitzako une boteretsuenetakoa ere bada. Une honetan, baina, erditzen ari naizena ni berri bat izango da, ni jaioko bainaiz berriro. Bizitza berri bat sortzeko aukera dugu hilero, opari erraldoi bat izatekoa.

Renu Li, Tao Yogako irakaslea: Iragana aldatu daiteke mugituz eta gauzak beste era batera eginez. Blokeoak aska ditzakegu eta iragana ireki odola aske isuri dadin, minik gabe. Bat-batean konturatuko zara lortu duzula kontrola izatea eta jada ez da izango gaizki sentitze hori, gauza hori. Bestalde, emozioak heredatzen direla gauza jakina da, eta gaurtik aldatzeko aukera daukagu guztiok.

Munduan nahi duzun aldaketa izan zaitez (Ghandi)