Ilusioa ere salgai

Atalak: Gorputza

Beharrezkoak ez ditugun hamaika gauza. Elkartasuna eta anaitasuna. Irribarrea eta poztasuna. Turroia, txanpaina. Topa. Bazkariak eta afariak. Janaria eta janaria eta familia. Opariak. Eta ilusioa ere salgai. Zein goxokia diren Gabonak sistema kapitalistarentzat.

“Bakea eta anaitasun iragarkiak. Gerora ez baliagarriak”, Soziedad Alkoholika

Olentzero maitea. Gabonetan primeran portatu naiz. Amonari lagundu diot hogeirentzat bazkariak prestatzen. Anaia bisitatzera joan naiz eta izebari postala bidali diot baita ere. Kalean eskean zebilen pertsona bati dirua eman diot. Txakurra laztandu dut eta etxea garbitu. Familiarekin elkartu naiz.  Bizilaguna gonbidatu dut bazkaltzera, bakarrik zegoen eta. Eta lehengusuari jostailuak oparitu dizkiot.

“Turroia eta txanpaina, horrek ezin du falta, bihar jaterik ez badago ere”, S.A

Eskerrik asko ekarri didazun kotxeagatik, jada ez dut erabili beharko ama edo nebarena, ezta aitaren motorra ere. Mila esker zapatila berriengatik, egun bakoitzerako pare bat daukat orain. Eta aurten ere ez da falta izan urtero ematen didazun paga. Gaur ere parranda egin dezaket, beraz.

“Hainbeste hipokrisia, hainbeste faltsukeri”, S.A

Baina pasa dira Gabonak eta hasi dira marmarrak. Orain kotxea izanda amona Donostiara eramatera behartu naute. Goiz jaiki eta txakurra atera behar dut, gainera. Eta bizilaguna eskean. Hau den hau. Hurrengo astean izebak bazkaltzera gonbidatu gaitu, baina plana daukat. Guzti honekin, gainera, ez daukat opariekin jolasteko astirik. Joe!

“Haurrak telebistako botoia sakatu behar du, ez du imajinaziorik balio”, S.A

Zoriontsu egiten gaituzten beharrei erantzuten diete Gabonek. Hala bada, zerk egiten gaituen zoriontsu pentsatu beharko genuke. Eta zer den behar duguna. Zein pozik bizi garen ilusioaren mozorroaren azpian. Zerrekiko ilusioaz hitz egiten ari gara? Hitz egin dezagun norberarenaz. Hitz egin dezagun deskubritzeaz, ikastez, jakiteaz, zerbait edo norbait ezagutzeaz. Ikusteaz, sentitzeaz, laguntzeaz, jasotzeaz, emateaz. Eraldatzeaz, sortzeaz, lortzeaz, gozatzeaz. Izateaz.

Ondo pasa.