Bozal Legea

Atalak: Sailkatu gabea

Bozala (muturrekoa): ahoa irekitzen uzten ez duen larruzko edo plastikozko pieza. Gutxigatik, arnasten uzten duena. Ez al da ba hau Espainiako Gobernuak adierazpen askatasunari ezarri nahi diona?

Sinpleenera jota, nola uler daiteke askatasuna muga batzuen pean?

Argi dago, Espainiar Gobernuaren aurka altxatzen diren mugimenduak kontrolatzeko modua dela. Herritarrak isildu, ignorantzian bizi eta poliziak lasai asko egin dezan bere ekintza. Hala ere, ahoa itxi nahi badigute irakurtzen dutena gustatzen ez zaielako izango da. Hara! Ez egin horrelakorik!

Mozal legea indarrean uztaila aldean jartzeko asmoa badute ere, zenbatetan jasan dugu jadanik adierazpen askatasunaren aurkako ekintzarik? Pankarta bat jartzeagatik atxilotzea, txiokatzeagatik atxilotzea, ilegalizazioak, komunikabideak itxi, sare-sozialak itxi, ekitaldi baten bideoak sareratzeagatik espetxe zigorra… Hala gertatu zaio Iraitz Salegi Topatu.info-ko kazetariari: hemezortzi hilabeteko espetxe zigorra 2013ko Gazte Danbadako ekitaldiko bideoak azaltzeagatik. Bere lana egiteagatik, informatzeagatik. Nonbait azkura ematen die haietaz hitz egitea eta ez dute azala gehiago urratu nahi.

Orain halako neurriak eta zigorrak jartzen badituzte, lege baten babesa dutenean zer? Eta gertakarien zein bertsio ezagutuko genuke? Adibidez; Aske Guneetan poliziaren jarduna ezagutuko ez bagenu zein istoria zabalduko litzateke? Eta kazetaririk bertan ez balego nolakoa litzateke poliziaren jarrera? Guzti hori ezkutatzea eta isiltzea dute desira. Herria presionatuagoa eta polizia presiorik gabe.

Muturrekoa eman jarri nahi digute, beste txakur batzuek hortzak zorrozten dituzten bitartean. Herritarren segurtasunerako legea?