Energiaren kanalizatzaileak

Atalak: Sailkatu gabea

Rei; unibertsoa eta Ki; energia, unibertsoko energia, alegia. Izen hori hartzen du eskuen bitartez energia gorputzera transmititzea helburu duen terapiak, desorekan dagoena orekatzeko.

Medikuntza forma hau Japonetik dator, Mikao Usui budistak garatu zuen 1922.urtean. Gorputz fisiko zein energetikoak orekatzea du helburu. Izan ere, maila fisikoa, emozionala, espirituala eta mentala orekatzen dituela diote adituek. Energia hori pertsonok garraiatzen dugu terapia honetan, kanalizatzaileak gara. Burutik sartu eta eskuetatik ateratzen dugu eta geure buruari zein beste pertsonari transmititu.

Ilustrazioa: Izaro Mariezkurrena

Nekane Garcia Arbelaiz aditua, 2007an hasi zen Reiki ikasten eta hari eta familiari ekarritako onurak kontuan hartuta irakaslea izateko diploma eskuratzea erabaki zuen. Hala egin zuen 2014an eta orain kontsulta propioa dauka Hendaian: “Urte asko daramat terapia naturalak eta osasuna eta garapen pertsonalaren inguruan ikasketak egiten: Reiki, coaching, naturopatia, kinesiologia, tapping, Bach Loreak, elikadura osasuntsua, meditazioa… Besteak beste, nire emozioak hobeto kudeatzen, intuizioa berreskuratzen, bizitza modu positiboagoan ikusten eta energia gehiago izaten lagundu dit. Hori besteei ere erakutsi nahi nien”.

Garciak Reiki ikasteko tailerrak ematen ditu gaur eta gero eta jende gehiago hurbiltzen dela kontatu digu. “Urtean gutxi gora-behera 60 pertsonek jasotzen dute ikastaroa, adin eta mota desberdinetakoak. Bi hilero egiten ditut eta taldea sortzen bada lehenago ere bai”, kontatu du. “Gizartea gero eta kontzienteagoa da gure ongizate eta osasunaren zati handi bat gure esku dagoela. Izan ere, bizi kalitatea hobetzea du helburu hurbiltzen den ehuneko handienak: antsietaterik gabe bizi, depresiorik gabe, bizi pozez, energiaz eta emozionalki orekan”.

Lierni Arrieta Iruretak jaso du jada ikastaro hori. Lau “maila” daudela azaldu digu. Berak, lehenengoa egin du eta bi aldiz, gainera: Hendaian eta Durangon. Egun bateko ikastaroa izan zela adierazi du eta ondoren ariketak egin behar izan zituztela hiru bat astez eta egunean hamar bat minutuz.

Arrieta ama izan zenean hasi zen Reikira nahi gabe hurbiltzen. Haurrekin komunikatzeko eta konektatzeko masajeekin hasi zen. Gerora, ordea, gehiago nahi zuen. Aita alhzeimerrarekin gaixotzeak ere bultzatu zion. Gaur, etxean eta etxekoekin erabiltzen du Reikia, batez ere bere buruarekin: “Gauetan esnatu eta ezin lokartu nagoenean, haserretzen naizenean, haurrak gaixorik daudenean, aitarengana hurbiltzean…”. Eskuek transmititzen duten energiaz gain, unea bera mirensten du Arrietak, denbora hori hartu eta zurekin zein bestearekin konektatzea: “Ezer egin gabeko momenturik ez dugu hartzen. Lotan ez bada, ez dago isiltasun hori, egoten egote hori. Besteari egiten ari zarenean ere, bestearekin pentsatzen ari zara, bestearenean zaude. Hori ere ez dugu askotan egiten eta opari bat da”. Eskuak gorputzeko atal desberdinetan ipintzeak ere gorputzarekiko lotura estutzen duela gaineratu du: “Sustraietako txakra errepasatzen ari zarenean, adibidez, garunak zera dio: sustraitu zaitez! Hemen zaude eta hau da errealitatea”.

Reikia, ordea, gaixotasunak baretzeko erabili ohi da, ez beti sendagai. Arrietak kasu bat jarri digu: “Lagun baten amona gaixo zegoen, hilzorian, eta Reikiarekin heriotza lasaia izan zuen”. Garciak gehitu du, gaixotasun larri eta kronikoetan dela oso lagungarria, animotsu mantentzen laguntzen baitu. Osasunaren Mundu Erakundeak (OME) Reikia onartu du eta erietxe gehiagotan erabiltzen ari da.

Bestalde, bakoitzarentzat erabilgarria zer den baloratu beharko lukeela azpimarratu du Arrietak: “Pertsona batek, agian, gaixoaldi hori beharko du bere bizipenean eta hori ere onartu behar da. Bakoitzak bere bidea egingo du eta Reikiak samurtzen lagunduko dizu. Seme-alabak gaixo egon eta Reiki egiten diedanean, hobeto ikusi izan ditut. Baina, agian hobera egin behar zutelako da. Hori ez dakit neurtzen”.