Zorionak Euskal Herria?

Atalak: Gorputza

Info Zazpik idatzitako txio batean zioen Antonio Alvarez Solis kazetariak: “Estaturik gabeko nazioentzat Europako munstroaren aurrean beharrezkoa da ahotsa izatea”. Ez dut ukatuko garrantzitsua ez denik, baina hortik zorionak esateraino…

“Tristea da dena ospatu beharra, oraindikan dena lortzekoa da”, Berri Txarrak.

“Ordezkatuko gaituzten” horiengan konfiantza osoa jartzeagatik zorionak. Kanpaina osoa botoa eskatzen igaro dutenei botoa emateagatik zorionak. Ez ditzagun gauzak nahasi eta dena politikaren esku utzi, ez politikarien esku.

Zer lortu da? Zer lortu nahi zen eta nork lortu du? Guk? Gutun-azal bat kutxa batean sartzeagatik? Guk? Zerbait erabakitzeagatik? Erabaki zer? Zein punturaino interesatzen zaigu Europan egotea? Zer egingo dugu Europan?

Europatik borrokatuko da gazteek lan baldintza duinak izateko? Europatik babestuko da Euskal Herriko kultura? Europan hitz egingo dugu euskaraz? Europan salatuko da atzo Atarrabian izandako eraso sexista? Nork defendatuko ditu nire herriko kaleak eta biztanleak? Europak? Jatorriagatik, sexuagatik edo adinagatik zatikatu eta epaituak ez garen beste eredu bat zer landuko da Europan? Nork egingo nau aske?

Herriaren oihartzuna nahi badugu herriak hitz egin beharko du lehenik. Borroka herrian hasten da, norbanakoan eta ez Europan. Borroka egunerokoan dago, pertsonengan. Norberak sinesten dituen gauza horiek babestean, sistema honi etengabe aurre egitean. Borroka ondokoari laguntzean datza, antolatzean, ekimenak gauzatzean, iritzia ematean, biltzean, euskaraz egitean, idaztean, dantzatzean, jolastean, jarrera aldatzean, boikoteatzean, bultzatzean, intsumiso izatean. Kalera irtetean.

Ez gara pentsatzen duguna, ez gara bozkatzen duguna, egiten duguna baizik.