375Photo, aro berri baten hasiera

Atalak: Argazkilaritza

© Ariana Nalda

Ez da urtebete pasa maletak egin, Bartzelonan etxebizitzatzat geneukanaren lehioan ‘alokatzen da’ karteltxoa jarri eta ostera ere Euskal Herrira itzuli nintzenetik. Sobera penatuta baina aro guztiak beraien amaierara heltzen direlako ustean ekin nion etxera bidea egiteari, pauso motelean, hastear neukan etapa berriak zer ekarriko urduri eta mesfidati. Kosta egiten zitzaidan onartzea, baina igaro berri nuen urte hartan egindako bizitza atzean uztera nindoala irentsi beharra neukan. Iragan hurbila eta etorkizun irudikaezin baten inguruko hausnarketa horietan murgilduta egin nuen etxerako bidea, bizi nuen momentua halako katastrofismo puntu batetaraino eramanda, non ezinezkoa egin zitzaidan barnean ernaltzear (ge)neukan ideiarengan arreta jartzea. Pare bat hilabeteren bueltan, nahikoak izan ziren Bartzelonako ikaskide Ariana Nalda eta Carles Palacio-rekin mantendutako elkarrizketa gutxi batzuk aipatu ideia hori ‘375Photo’ bezala izendatu dugun proiektuan bilakatzeko.

© Amaia Lekunberri

Fotokazetaritzaren esparruan toki bat egiteko helburuarekin sortu dugu 375Photo kolektiboa, argi eta garbi, elkarlanean ikusi baitugu xede hori lortzeko giltza posiblea. Ikasgelatik pasa izan zitzaizkigun profesional ia guztiei fotokazetaritza krisialdian zegoela entzuteaz aspertuta, hitzaldi horietan transmititzen zitzaigun mezu pesimistari ezikusi egin eta hasiberri bezala daukagun grinari etekina ateratzeko formula posibleak planteatzetik jaio da 375Photo. Gazte, prekario, emakume eta herrialde zapalduetako kide izateak batzen gaitu kideok, antzerako errealitateak bizi ditugu, eta errealitate horien berri kontatu beharra sentitzen dugu. Sei begi geldiezinez baliatuta ekingo diogu hedabide nagusietan tokirik ez duten errealitateei ahotsa ematen, eta sei begi geldiezinez ahaleginduko gara zuen begiekin kontaktu bat ezartzen.

2014ko maiatzean sartuta gauden honetan, aro berri bati ekin diogula badakit, baina etapa honetan grinak kendu dio tokia katastrofismoari. Orain badakit aroak hasi eta amaitu arren, beti dagoela loturaren bat aro guzti horien artean. Ekin diogun aro honek ere, egingo du lotura datorren beste batekin, eta horrek etorkizuna gris tonu argixeago batekin irudikatzea ahalbidetzen dit. Urte askotarako, 375Photo.

© Carles Palacio

www.375photo.com

www.twitter.com/375photo