[Itsaso Zubiria Etxeberria] ARGIAren irakurle den lagun batek kuriositatez galdetu dit, orain gutxi, nola izan ohi den erredakzio baten antolaketa. Alegia, nola aukeratzen diren gaiak, elkarrizketak, papereko azalak, nola koordinatzen den lan guztia. Eta nik, erdi lotsatuta, erantzun garbirik ez daukadala; kolaboratzaile naizela. Eta bere ahoa, pixkanaka, zabaltzen, geroz eta harridura aurpegi handiagoa jarriz, esanez bezala, “aitzakia merkerik ez niri, ziur egunerokoak harrapatuta ezin antolatuta ibiltzen zaretela, bakoitzak berea egin eta gero nola edo ahala puzzlea osatu”. Modu pertsonalean jaso ditut begiradarekin botatako balak eta erantzun bila hasi naiz, tiroen zauriak zornatu aurretik.
Asteartero egiten da Lasarte-Orian erredakzio bilera, 14:00etatik 17:00etara bitarte. Kazetari guztiak (idazten dutenak eta ikus-entzunezkoetan aritzen direnak, diseinatzaile/maketatzailea eta argazkilaria) biltzen dira, eta gidoi zorrotz bati jarraitzen diote. Hasteko, erronda. Kazetari bakoitzak azaltzen du aste horretan nola dagoen, zertan ari den, estu dabilen, ez, beste ezer baduen… Tenperatura hartu. Segidan, argitaratzera doazen astekariaren errepasoa, nola geratzen ari den ikusteko, arazo berezirik dagoen… eta azala aukeratzeko lanak hasten dira. Denen artean aukeratzen baita asteko portada. Batzuetan argiago egoten da eta beste batzuetan bizpahiru aukeren artean eztabaidatu ondoren, kontsentsu bidez erabakitzen da. Irudi nagusiaren azpiko hiru txikien txanda heltzen da gero. Eta horiek aukeratutakoan, Interneten antolaketa. Astelehenetik ostiralerako orria zabaldu eta bururatutako lanak botatzen joaten dira astea gutxi gora-behera antolatuta utzi arte.
Hori lotuta, datozen astekarietarako aurreikuspenak errepasatzen dituzte. Eta argitaratu berri den astekariaren balorazioetan sartu aurretik, bestelako gaiei irekitzen diete tartea. Batzuetan kazetaritza lanez jarduteko balio izaten du, alegia gai bat edo bestea nola landuko duten aztertzeko, Interneten eta paperean nola jorratuko duten. Baina izan liteke kazetaritza egiteko moduetan eragiten duten gaiez mintzatzeko espazio bat ere. Azken aldian, esaterako, hitz egin dute sare sozialen gaiaz edo Adimen Artifizialaz.
Eta hau dena dinamizatzaile batek gidatuta. Hilabeteko ardura izaten du kazetari bakoitzak, lauzpabost saio, eta kazetari guztiek hartzen dute parte lan honetan.
Badakit artikulu hau interesez irakurriko zenuena, lagun. Bada to, hor, entzun nahi ez zenuen erantzuna. Zuk nahiagoko baitzenuen gure miseriak kontatzea. Trapu zaharrak etxe denetan, bai, baina erredakzioa antolatzen ez denik behintzat, ezin esan.
