Gogora datorkit Iratxe lagunaren izebarekin ikastolan ostegun arratsaldeetan egiten genituen puntu tailerrak. Edo Albaren aitarekin pintura. Txominen amarekin sendabelarrez egindako ukendu tailerra. Gurearekin antzerkia. Orain jabetzen naiz pribilegiatuak izan ginela, ez baitu edonork guraso eta eskolaren arteko lotura estu hori bizi izan haurtzaroan. Gurean hezkuntza komunitatean sinesten zen, etxean eta eskolan, eta teorian bakarrik ez, praktikan jartzen baitzen.
Tamalez orokortu ez badira ere, martxan daude hezkuntza komunitatea ardatz duten proiektuak eta ARGIAk leku egin nahi die bere webgunean. Hezkuntza ARGIAk asko jarraitzen duen arloa da eta pauso bat gehiago eman nahi du: hezkuntza kanalak diseinu berria, aukera gehiago eta bi nobedade potente izango ditu 2026ko urtarrilaren 12tik aurrera.
Etxerako lanak
Podcast berria estreinatuko da: Etxerako lanak. Mikel Garcia Idiakez kazetaria izango da gidaria eta hezkuntza munduko adituak izango ditu bidelagun asteleheneroko maiztasunarekin argitaratuko den irratsaio honetan. “Hezkuntza eta heziketa izango ditu oinarrian podcastak, eta gaia eskolako lau hormetara mugatu gabe, heziketa gurasoenganaino, hezkuntza komunitate osora zabaldu nahi dugu”, adierazi du Garciak.
Ikusi eta ikasi
Bideoerreportaje sail bati ere ekingo diote hileroko maiztasunarekin, Ikusi eta ikasi, hileko bigarren astelehenetan. Kasu honetan, eskoletako esperientzia onak ekarriko dizkigute, guretzat interesgarri diren adibideak denon eskura jarriz. “Askotan ez dugu jakiten bizilaguna zertan ari den ere, eta horrelako esperientziak denon eskura jartzea uste dugu interesgarria dela hezkuntza munduko denentzat”, esan du kazetariak.
Gure ikastolaren, irakasle eta guraso konprometituen inguruko oroitzapen onez betea dut bihotza. Baina akats ohiko batean erori ziren eta esan beharra daukat: kopiatzea zerbait oso grabea dela irakatsi ziguten. Ba ez, jada eginda, asmatuta dagoenari erreparatu eta ona bada, baliagarri bazaizu, kopiatu beldurrik gabe!
