[Itsaso Zubiria Etxeberria] Uste dut umetan tentatzen ninduela ezkutuko egia aurkitzeko lanak. Hala oroitzeko kapritxoa du, behintzat, nire irudimenak. Beti iruditu zait, ordea, urrutiko zerbait; nire eskueran geratzen ez den lan bat. Eta ikusten dudanean ARGIA bezalako komunikabide txiki bat horrelako ikerketa bat argitara ematen, liluratu egiten nau. Nola lortu ote dute informazio horretara iristea?
Ez nator misterioa argitzera, irakurle, eta ez dizkizut informazio-iturriak, bideak, aztarnak eskainiko artikulu honetan, hasteko, nik ere ezagutzen ez ditudalako. Baina iruditzen zait kontatzeko modukoa dela, ARGIAren tamainako komunikabide batentzat euskararen aurkako oldarraldi antolatuaren atzean dagoen pastel zatia argitaratzeko egindako esfortzua nolakoa izan den. Hiru urte egin behar dugu atzera ikerketaren lehen urratsetaraino heltzeko. Oldarraldi judizialaz hitz egiten zen 2023 hartan, baina epaileen erantzunak jasotzera iristeko, esan nahi zuen aurretik bazegoela salaketa ere. Hor jarri zuen Zigor Olabarriak lehenengoz lupa. Hori izan zen lehen hipotesia: “Hauek ez dira helegite solteak, antolatuta daude”. Ez du esan nahi hiru urte hauetan buru-belarri ikerketa-lanean aritu denik: “Euskararen aurkako mezu, oldarraldi eta giroarekin kezkatuta, hipotesi hori esku artean, Lander Arbelaitz eta biok hasi ginen gutxika gaia aztertzen”, azaldu digu Olabarriak. Batekin hitz egin, hitzaldiak entzun, gauza bat eta beste leitu, helegiteak eta ebazpenak eskuratzen saiatu… prozesu luzea izan da eta oldarraldi antolatuaren ideia indarra hartuz joan da, baina Errenteria kasuko frogak azken unean iritsi dira. “Larrun hilabetekaria egina geneukan eta argitaratzeko data ere zehaztuta, bazeuden helegite deigarri batzuk eta zerbait antolatuaren zantzuak, baina ez geneukan froga definitiborik, otsailean Errenteriakoa jaso genuen arte”, xehatu digu.
Lantalde berezia martxan
Ez dago ikerketarako lantalderik egunerokoan ARGIAn, eta lan gehigarri bat izan da hori guztia. “Ipar Euskal Herriko hauteskundeak, martxoaren 17ko greba orokorra… tartean tokatu dira beste lan-karga batzuk ere, baina horren gainetik, emoziotik eta erantzukizunetik, bederatzi lagunek hartu zuten lantalde berezia martxan jartzeko konpromisoa”, azaldu du kazetariak. “Beti da gezurra, neurri batean, pertsona bakarrak sinatzen duen lanaren egiletza, beti egoten baita atzetik talde-lan bat; baina beti gezurra bada, oraingoan inoiz baino gehiago, hau ARGIA ikerketa-taldeak sinatzeko modukoa zen”, azpimarratu nahi izan du.
2026ko urtarrilera arteko ikerketa-lanak zama sortu badu, Errenteria kasuko frogak heldutakoan hartu du beste dimentsio bat gaiak hedabidean. Lantalde berezia martxan jartzeak esan nahi izan du, ez bakarrik jendea horretara jartzea, baizik eta egunerokoan Zigorrenak diren lanak (zuzenketa-lanak, editoretzak Interneten…) lankideek hartzea eta ARGIAren eguneroko funtzionamenduari beste hanka batzuk jarrita eustea.
Bertigo puntuarekin, arduratik, lanorduetatik kanpo, militantziaz… aritu da ARGIAko lantalde osoa, eta mugitu du ikerketa-lan honek euskararen tableroa. Orain bakoitzari dagokigu posizioak hartzea.
