[Itsaso Zubiria Etxeberria] Larzabaleko (Oztibarre, Nafarroa Beherea) basoan murgildu da Garbi\u00f1e Larrea ibilaldi botanikoa eginez inguruko landareak ezagutzeko asmotan. Ostatu bat baino gehiago den Espelleteniak antolatutako Belagile zikloaren baitan izan da, bigarren urtez Larrea, eta han ikusi\/bizitakoak kontatu dizkigu, komunitatearentzat. Oztibarren ere bai baita komunitatea, eta ez nolanahikoa.<\/p>\n
Herritik bertatik abiatu da larunbat goizez taldetxoa, bertan duten basoan murgildu eta landareak ezagutzeko. Larreak berak aurretik antolatzaileekin batera zerrendatu ditu zenbait landare, landuta eramateko, baina horiez guztiez gain, gehiago ere topatu dituzte, hogei espezie inguru denera, urrutira joan gabe. \u201cEz dago, jende batek hala sinetsita badu ere, mendian gora igo beharrik sendabelarrak aurkitzeko\u201d, azaldu digu \u201cpentsa, hiru orduko ibilaldia izan da eta ez genuen kilometro bat baino askoz gehiago egingo!\u201d. Erabileraz mintzatu dira asko, beti fokua jarrita identifikazioan: \u201cMugikorretako aplikazioak itzali eta gure gaitasunak garatu behar ditugu, garrantzitsua da espezieak ondo identifikatzea, gure segurtasuna baitago jokoan\u201d, azaldu du Larreak.<\/p>\n
\u201cOso ibilaldi parte-hartzailea izan da eta Hegoaldean ez bezala, Iparraldean askoz presenteago dago lehen sektorea eta galderak ere desberdinak izan dira; animalien kasurako erabilerez aritu baikara, esaterako\u201d. Larrearen saioetan landareak dira beti protagonista eta ingurua \u201czaindua\u201d ikusi du: \u201cOrokorrean ez dago naturarekiko politika erasokor bat, orokorrean diot, justu atzo izan baitzen hemen protesta bat Carrefour berri bat eraikitzeko asmotan direlako, baina ibili garen inguru honetan biodibertsitate handia dago eta hori aberatsa da oso\u201d.<\/p>\n