Bart Simpsoni pilula batzuk eman zizkioten, eskolan arreta jar zezan. Eta jarri bazuen, jarri zuen: kontzentratuegi-edo, erotu egin zen kapitulu bukaerarako, beisbol ligak satelite bidez espiatzen zuela pentsatzeraino. Tira, pentsatu; azkenean egia izaki. “Baina zer ari haiz, Gorka, jendeari Simpsondarren kapitulu zahar bat kontatzen?”. Ya, ya, egia. Baina ezin besterik egin, bihar Dokan joko duen talde baten izena ikusita: Focusin. Izen hori baitzuten Barten pilulek.
Agian botika horren efektupean (batek daki mundu aldrebes honetan sakarinaren partez zer botatzen diozun kafeari), adi-adi egon naiz talde gasteiztarraren kantak entzuten. Eta ulertu dut zergatik esan zidan Iñaxio Esnaolak (Herri Irratiko Sektor Rock saioko esataria eta kontzertuaren antolatzailea, beste gauza askoren artean) gustuko izango nituela. Grises zestoarrekin batera joko dute 20:30etatik aurrera, “SRFest batpuntuzero” kontzertuan.
Kontzertua bukatuta ordea, musikak ez du zertan amatatu, zuen osasun kulturalarekin hainbeste kezkatzen naizen honen gomendioak jarraitzen badituzue: 1) entzun Sektor Rock noizean behin, irrati-formularen eta top-txosnaren aurkako antidoto onena da; eta 2) jarri arreta asteazkenetan, 23:00etatik aurrera Herri Irratian emititzen duten Harrob!a uhinzineari. Inguruko panorama musikala uste duzuena baino askoz zabalagoa dela jabetuko zarete.
PS: Iñaxio, honen ondoren ostiralean kontzertura doan sartzen ez banaiz, zin dagit musikari buruzko hurrengo post-a heavyen larrutze sistematikoa izango dela.
1 Iruzkin
Gorka, maite zaitut. Laudorio gehiegi gauza onerako. Presioa areagotu didazu. Bi sarrera ere badituzu aukeran.