Lennonen bila

Road movie konbentzional baina eraginkorra da David Truebaren Vivir es fácil con los ojos cerrados. 1960ko hamarkadako Espainian girotua, ingeles irakasle bat du protagonista, pantailan agertu den lehen unetik publikoaren konplizitatea alde daukan Javier Cámarak antzeztua.

John Lennon Almerían film bat errodatzen ari dela jakitean, autoa hartu eta harantz abiatuko da. Bidean aurkituko ditu haurdun dagoen neska gazte bat (Natalia de Molina) eta aita jasan ezinda etxetik alde egin duen nerabe bat (Francesc Colomer). Lennon aurkitu bitarteko bidaia iniziazioa da hiru pertsonaientzat, euren bizitzen norabidea aldatzea ekarriko duena.
Mota honetako film bati eskatzen zaiona ondo betetzen du pelikulak: hari narratiboak zentzuz uztartzen dira, umorezko tarteak ditu baina komiko bihurtu gabe eta sepia koloreko argazkiak laguntzen dio filmaren ukitu malenkoniatsuari.
Espainiako film askorekin gertatzen zaidan bezala, Truebaren honekin ere iruditu zait elkarrizketa batzuk kartoi-harrizkoak direla. Bestalde, zalantza daukat filmaren mezua ez ote den apur bat CT (Trantsizioko Kultura espainiarraren ideologiaren ildokoa, alegia), nahiz eta 1960ko beatlemaniako gazteen eta gaurko belaunaldi galduaren arteko ispilu-joko bat entseatzen duen.
Edonola, lan txukuna iruditu zait, handikeria askorik gabe egina eta ia bi ordu erraz eusten dituena (Sail Ofizial honetan ikusi ditugun metraje-gehiegikeria askok baino hobe).
SAIL OFIZIALA
Vivir es fácil con los ojos cerrados
Zuzendaria: Davit Trueba.
Aktoreak: Javier Cámara, Natalia de Molina, Francesc Colomer.
Espainia.
108 minutu.