Donostia 2016: badator programa baina ez da joango zarata

Konkretatu dezagun beraz. Donostia 2016 hiriburu kulturalaren lan taldeak martxoan herritarrei azalduko die proiektua zertan den eta programaren aurrerapena publiko egingo du. Bost hitzordu aurkezpenetarako. Lehenbizikoa ostiralean, martxoak 6, Antigua auzoko Lugaritz kultur etxean.
Beste lau hilaren 16ra bitartean –noiz nola, egitasmoaren webgunean; azkenekoa zuzeneko streaming bidez eskainiko dute “bertaratzea ezinezkoa duten guztiek aukera izan dezaten, besterik ez bada, urrunetik ere proiektuaren xehetasunak ezagutzeko”–.

Eta hortik aurrera, plazara: auzoetan aurkezpen gehiago egingo dituzte, nagienari ere lana erraztuko zaio, datorren urtean Donostian hizpide nagusienetakoa izango den gertakariaren detaile txikienaz ere bide zuzenetik enteratzeko.
Urrats txikia lan taldearentzat, handiagoa egitasmoarentzat, ilargian egon ez badira ere uste nahiko zabaldua baita orain arte egin den lana ez dela behar bezain ongi komunikatu. Ez dute lagundu etxe barruan izan diren arazoek, ezta suhiltzaileena zen bulegoan katilu bat puskatu denerako sei mikrofono eta hamabi anplifikadore gertu egon izanak kriski-kraska zabaltzeko.
Kudeaketak eta teloi atzeko kontuek sortu duten zarataren ondoren, beraz, hitz egingo ote da egitasmoaren dimentsio kulturalaz behingoz?
Ba, errealistak izanda, ez dirudi. Irakurri bestela aurrekanpainako adierazpenak, golak sartzeko gogoz etorri den Ernesto Gasco PSEko hautagaiarenak kasu. Donostiarrismoa, ideologia hori, 2016 izeneko adierazle hutsa nola bete ibiliko da maiatzera bitartean.
Ariketa hutsal samarra portzierto: inork uste al du 2015ean hain ondo sarturik gaudenean proiektuak 180 graduko aldaketarik eman dezakeenik? Jokoan dagoena papurrak dira, titular batzuk poltsikoratzeko aukera, eta argazkian zein politikarik eutsiko dion arrantzatutako piezari, zeina, kargudunak militatzen duen partiduaren arabera, bihurtuko den izokina ala korrokoia, soineko urdin-beltz/zuri-urrekara baino misterio txikiagoari erantzuten dion distortsio pertzeptibo batek eraginda.
–Benga motel, ez hasi betikoarekin.
–Bai zera, niri kontu honek ni-fu-ni-fa.
–Ostiralean Lugaritzen orduan?
–Beharko.