Bizitzan galdu samar dabil El apóstata filmeko protagonista: ikasketak bukatu ezinda, lehengusinarekin harreman ezinezko batean eta eliza katolikoarekin bataiotik daukan lotura hautsi nahian.
Protagonista bezain galduta dabil filma ere, mami gutxiko lana da Federico Veirojena. Egiazki, ez dut oso ondo ulertu zein zen zuzendariaren helburua ere. Protagonisten izaera xelebreek komedia itxura ematen dioten arren, eta eszena dibertigarriak badituen arren, istorioaren elementuak ondo lotu gabe agertzen zaizkigu, indefinizioa da nagusi. Alvaro Ogallak antzezten duen protagonistaren ibilera hutsalek Oliver eta Benjiren kontraeraso eternal horietako bat baino luzeago bihurtzen dute metrajez laburra den pelikula hau.
Musika da agian balantze triste horretatik salbatuko nukeena, zenbait kanta diegesian sartzeko modua bitxia baita behintzat (tartean Lisabö irundarren pieza bat).
Gainontzean, iruditzen zait apostasiarekin lotutako istorio honek askoz aukera gehiago izango zituela film laburra izan balitz.
SAIL OFIZIALA
El apóstata
Zuzendaria: Federico Veiroj
Aktoreak: Álvaro Ogalla, Marta Larralde, Bárbara Lennie, Vicky Peña, Juan Calot, Kaiet Rodríguez
Espainia-Uruguai-Frantzia
80 minutu
1 Iruzkin
Zaila zirudiena lortu du film honek: “Evolution” baino jasangaitzagoa bihurtzea.