Sailkatzen zaila den lana da Evolution, abiapuntutik sortzen duen munduan sartzea eskatzen duena.
Irla bat, paisaia bolkanikoa, mutil-kozkorrekin bizi diren emakume ilegorri batzuk eta haien bizimodu bitxia: eguneroko errutinan emakumeek botika beltz bat ematen diete haurrei, angula moduko batzuk dituzte elikagai bakartzat eta koadro orokorrari sekta baten tankera hartzen zaio.
Zergatik bizi diren horrela? Iradoki egiten da, erabat esplikatu gabe. Haur batek itsasoaren hondoan gorpu bat ikusiko duenean hasiko da kuestionatzen bere bizimodu arrarunoa.
Zientzia-fikzio deseraikitzat joko nuke emaitza, gurearen errealitate paralelo bat erakusten baitu, izugarria bezain monotonoa izan daitekeena (generoan ohikoagoa den gizateriarentzako mehatxurik adierazi gabe), egiantzekotasuna galdu gabe eta trikimailu errazei muzin eginez. Hori du puntu interesgarriena seguraski: beldurra eragin zezakeen material bat eduki arren, izaki ikaragarrien sentsibilitatea azaleratzen duela.
Deskolokatuko zaituen pelikula baten bila bazabiltza, ez duzu aukera txarrena.
SAIL OFIZIALA
Evolution
Zuzendaria: Lucile Hadzihalilovic
Aktoreak: Max Brebant, Roxane Duran, Julie-Marie Parmentier
Frantzia-Belgika-Espainia
81 minutu
1 Iruzkin
[…] positiboenak, baina bazkalosteko siesta botatzeko aitzakia bihurtu diren filmak ere azaldu dira. Evolution ulertezina eta handinahiaz beteriko film frantsesarekin ala Sparrows, Fiordoetako paisaia […]