{"id":4122,"date":"2014-10-28T13:34:23","date_gmt":"2014-10-28T12:34:23","guid":{"rendered":"http:\/\/www.argia.eus\/blogak\/boligrafo-gorria\/?p=4122"},"modified":"2014-10-28T13:34:23","modified_gmt":"2014-10-28T12:34:23","slug":"euskal-herriko-segallari-txapelketa","status":"publish","type":"post","link":"https:\/\/blogak.argia.eus\/boligrafo-gorria\/2014\/10\/28\/euskal-herriko-segallari-txapelketa\/","title":{"rendered":"Euskal Herriko segallari txapelketa"},"content":{"rendered":"

\"Ty<\/a>
Ty Segall Intxaurrondon (argazkia: @hellehellei).<\/figcaption><\/figure>
\nEz dakit merezi duen Ty Segallek astelehen gauean Intxaurrondon jo zuen kontzertuaz lerro bakar bat idazteak. Aspaldian ikusi dudan zuzenekorik erabatekoena izan da \u2013duela bi urte Donostia erdia matrailezurra klak eginda utzi zuenekoa galdu nuen eta nire burua gorrotatzen dut horregatik\u2013, baina, kontua da, Amodio Jaunak bere blogean idatzi duen moduan<\/a>, ia inork ez zuela hutsik egin eta beraz kronika irakurtzeko interesa eduki dezakeen ia jende guztia han zegoela.
\nEdonola: astelehena eta aretoa kartoletaraino beteta. Zerbaitengatik da. Segall sasoian dago, ezin emankorrago diskoetan \u2013urtero bat gutxienez, gehiago ez badira\u2013 eta lehenbiziko taldea sortu duen nerabearen ilusioarekin taula gainean.
\nEgongo da esango duenik tipoak ez duela deus berririk asmatu. Eta agian ez zaio arrazoirik faltako. Kontzertua ikusi bitartean hau, hori, hura edo bestea lehenago entzun izanaren sentsazioa behin baino gehiagotan etorri zitzaidan. Oihartzun horiek ez dira imitatzaile soil batenak ordea. Esango nuke rock amerikarrak hamarkadatan utzi duen ondarearen gauzarik onenak bereganatu, beste ordena bat eman, eta proposamen desberdin bat egiteko gai izan dela, batere zerebral eta kalkulatua geratzen ez den emaitza lortuz, bidenabar.
\nZero postureo: jarrera indartsuz, perfekzionismotik at eta dibertsioari uko egin gabe, rockarekin berradiskidetzeko moduko kontzertua eskaini zuen. Hasieratik Les Paula bere gorputzaren luzapen bihurturik, energiaz eta zarataz betetako kantak josi zituen bata bestearen atzetik. Garbigailu batean sartu izan bagintuzte bezala atera ginen, galtzerdi grunge bat belarritik zintzilik, botoi psikodelikoak begietan, galtzontzilo heavyak txapela gisa, kamiseta pop bat orkatiletan.
\n
\"Superman<\/a>
Superman bat egin zuen ikusle batek, Segallek hala eskatuta (argazkia: Alain Cazenave).<\/figcaption><\/figure>
\nEgiten duenaz hain konbentziturik dago, momentu batean publikoko mutil bati eszenatokira igotzeko eskatu baitzion, ikusleen gainetik crowdsurfing<\/i> egiteko esan, eta aretoaren atzealderaino joan eta buelta egitea lortzen ez bazuen, kontzertua hortxe bukatuko zutela iragarri.
\nDenok eman genuen zerbait Ty Segallek dena ematen segi zezan. Irudi hauek\u00a0\u2013gogoratu, astelehena da\u2013 gehiago balio dute segallari txapelketan zer gertatu zen esplikatzeko eman ditzakedan azalpenek baino.
\n