Bidasoako erleak eskolara joan dira. Ikaslez ikasle polinizazio xelebre bat burutzen ibili dira, ingurugiroan duten garrantziaren kontzientzia zabaltzeko. Badirudi fruitu berriak sortu direla Bidasoaldean…
Erleen Salbamendu Sarea bultzatzeko proiektua
Labore Txingudi, BDS KOOP eta Bidasoako Erlezainak elkarteak hainbat hilabetetan lanean aritu gara, erleen eta polinizatzaileen mundua lehen hezkuntzako ikasleei modu didaktiko eta erakargarrian aurkezteko. Proiektuaren helburua gure haurrek erleekiko dituzten beldurrak kentzea eta ezjakintasunak argitzea izan da, eta, zeharka, intsektu polinizatzaileak zaintzearen kontzientzia sortzea ere bai.
Ikastetxeetan saio dinamikoak
Irungo Lehen Hezkuntzako lau ikastetxeetan izan dira Juan Mari eta Jexus, erlezainak biak, eta Oihana, Labore Txingudiko kidea. Erleak ere bai: laguntzaile eta protagonista. Jexus polinizazioaren prozesuaz eta elikagaiak sortzeko erleek duten garrantziaz aritu da; Juan Marik erlearen ezaugarriez hitz egin die. Ikasleengan jakin-mina piztu dute: Ba al dakizue zenbat hegal dituzten erleek? Eta zenbat hanka? Zenbat ezti sor dezake erle batek bere bizitzan zehar?… Ikasleen begiak parez pare zabaltzea lortu dute, guztiak erantzun bat emateko nahian besoak altxatuz. Erlauntza bat ikusteko eta ukitzeko, argizaria usaintzeko, eztia dastatzeko eta, unerik hoberena, erleak bizirik ikusteko aukera izan dute.
Jasotako ezagutza berrien emozio horiek guztiak ongi barneratzeko, erleen piko-pikoaren jolasa azaldu die Oihanak, eta hura margotu bitartean, ikasleei sortu zaizkien azken kezkak galdetzeko aukera izan dute beste behin.
Erleen piko-pikoaren jolasa
Julia Lasa ilustratzaileak diseinatutako erleen piko-piko jolas didaktikoaren bidez haurrek erleen ezaugarriak ikasi eta besteei adierazteko gaitasuna garatu dute. Piko-pikoa sortzeko urratsak:
- Inprimatu: Erleen piko-pikoa
- Koloreztatu eta ezagutzak bereganatu: erleak identifikatzea (erregina, langilea, erlemandoa), gertuko loreak desberdintzea (gaztain-lorea, txilarra, akazia-lorea), eta sortzen dituzten produktuak zeintzuk diren ezagutzea.
- Orria dagokion tokitik tolestu (jarraitu adierazpenak). Piko-pikoa egina dago.
- Hasi da jolasa! Mugitu piko-pikoa, aukeratu irudi bat, eta irudiari dagokion informazioa irakur ezazu. Ea zenbatek asmatzen duten!
Datorren ikasturtean berriz ere
Proiektuaren esperientzia zirraragarria izan da guztientzat; haurrentzat bereziki, baita irakasleentzat eta erlezainentzat ere. Batzuk zein besteek, une batez erleekin batera egin dute dar-dar. Irungo haurrak prest daude erleekiko eta polinizatzaileekiko kontzientziazioa zabaltzeko. Zoazte erletxoak, lore berri bila!
ERLEAREN SALBAMENDU SAREAn parte hartu.
