Komuneko paperean LIX

Goizean jaiki eta hamaika katu izaten zituen zain jangela estuan.

Katu bakoitzari ematen zion jaten bere katiluan,

bakoitzari gustuko zuen poltsatik,

bakoitzari komeni zitzaion dietatik.

Oilaskoa labean ipintzen zien batzutan,

barazkiak egosten besteetan,

untxiren bat ere bai noizbait.

 

Asteazken hartan

hamaika beharrean

hamar katu agertu zitzaizkion.

Eta katuek ez zuten untxi erregosirik jan nahi izan

eta labetik atera zuen bezala

sartu behar izan zuen frigorifikoan

bezperan erositako untxiaren alboan.

Hozkailuko atea ixtean

konturatu zen,

(orduan bakarrik konturatu zen)

labean sartu zuena

ezin zitekeela

bezperan

erositako untxia izan…