{"id":655,"date":"2016-11-04T14:10:33","date_gmt":"2016-11-04T13:10:33","guid":{"rendered":"http:\/\/www.argia.eus\/blogak\/santi-leone\/?p=655"},"modified":"2016-11-04T14:10:33","modified_gmt":"2016-11-04T13:10:33","slug":"under-the-shadow-itzalpean-donostiako-beldurrezko-astearen-gaineko-oharrak","status":"publish","type":"post","link":"https:\/\/blogak.argia.eus\/santi-leone\/2016\/11\/04\/under-the-shadow-itzalpean-donostiako-beldurrezko-astearen-gaineko-oharrak\/","title":{"rendered":"Under the shadow (Itzalpean) \u2013 Donostiako Beldurrezko Astearen gaineko oharrak"},"content":{"rendered":"
\"Bunkerrean,<\/a>

Bunkerrean, itzalpean<\/p><\/div>\n

Hirutan. Hiru aldiz sentitu nuen hotzikara \u2013buruan hasi eta bizkarrean beheiti egiten zuena\u2013 Babak Anvarik zuzendutako filma ikusi bitartean. Eta onartzen badugu beldurra sortzea dela beldurrezko film baten funtzio nagusia, hotzikara horiek aski behar lukete Itzalpean<\/i> pelikularen kalitatea azpimarratzeko. Izenik eman gabe utziko dudan bertze film baten antza igarri diote han-hemenka \u2013eta zer nahi duk erratea, irakurle maitea? Bai, ba, baduk horren antzekoa\u2013, baina horrek ez dio meriturik kentzen Iraketik heldu diren misilen izupean bizi den Teherango etxe batean kokaturiko istorio honi.<\/p>\n

Filmak testuinguru berezia baitu: 80ko hamarkada, iraultza ondoko Iran. Eta bi protagonista: Shideh (Narges Rashidi) eta haren alaba Dorsa (Arvin Manshadi) \u2013tira, eta, nahi bada, hirugarren bat: Dorsaren panpina, Kimia\u2013. Lehendabiziko minutuetan, ikusiko dugu nola debekatzen zaion Shidehri unibertsitatean ikasten segitzea \u2013medikua izan nahi zuen, haren ama bezala\u2013, gazteago zelarik izan zuen konpromiso politiko \u201cokerra\u201d zela eta; hurrengoetan, senarrari \u2013medikua bera ere\u2013 armadatik deituko diote, frontean dagoen ospitale batera joan dadin \u2013soldadutza horretara abiatu baino lehen, Shidehrekin izandako eztabaida batekin, ama eskasa izatea egotziko dio\u2013.<\/p>\n

\"Alabaren<\/a>

Alabaren sukarra ez du preseski birus batek eragiten<\/p><\/div>\n

\n

Eta horrela geldituko da Shideh: etxean bere alabarekin, Irakeko misilak direla medio husten ari den Irango hiriburuan. Orduan hasiko da alaba erraten pausoak aditzen dituela, eta bertze inork ikusi ez duen emazteki batekin mintzatzen dela; eta orduan, hondarrean amak ere Teherandik alde egitea erabaki duelarik, galduko zaio panpina; eta orduan hasiko da Shideh ere amesgaiztoak izaten eta etxean izaki arraroak \u2013existitzen zirenik sinesten ez bazuen ere\u2013 ikusten \u2013eta iruzkingile hau hotzikarak sumatzen\u2013.<\/p>\n

\"Dorsa<\/a>

Dorsa eta Kimia<\/p><\/div>\n

\n

Under the shadow<\/i> ingelesez slow burner<\/i> deitzen dena da, giroa astiro-astiro sortuz doan filma, pertsonaien ezinegona azaltzeko eta etorriko dena justifikatzeko bere denbora hartzen duena. Itzalpean<\/i>: Teheran Iraketik igorritako misilen itzalpean bizi delako, baina baita Shideh iraultzaren zaindarien itzalpean bizi delako ere \u2013bere ikasketak ezin akituz, etxean bideo aparatua sekretuan eduki beharrean, karrikara nahi duen jantziarekin ezin atereaz\u2013, eta baita bere senarraren begirada gaitzeslearen itzalpean ere \u2013tematua baitago ama-alabak haren gurasoen etxera joan beharko luketela, uste baitu emazteak ikasketak utzi behar izan izana akaso onuragarria izanen dela\u2013. Horrela, alabak ikusten dituen mamuak amak sentitzen dituen mehatxuen isla dira, edo, nahiago bada, amari sentiarazi dizkioten porroten alegoria. Zeren, etxera sartu diren espiritu gaizto horien kontrako borrokan egiazko medikua eta ama ona dela frogatu beharko baitu \u2013bere buruari frogatu beharko dio hori batez ere, inguruko guzien itzalpean bizi behar izateak sorrarazi dion segurtasun faltari aurre egiteko\u2013. Zaputzik \u2013aka spoiler<\/i>rik\u2013 egin gabe, erran dezagun akabera ez dela zoriontsua izanen.<\/p>\n