{"id":155,"date":"2009-05-28T18:27:47","date_gmt":"2009-05-28T16:27:47","guid":{"rendered":"http:\/\/argia.eus\/erredakzio-mahaia\/xabier-letona\/?p=155"},"modified":"2009-05-28T18:27:47","modified_gmt":"2009-05-28T16:27:47","slug":"eta-publikoki-agertu-da-hausnarketara","status":"publish","type":"post","link":"https:\/\/blogak.argia.eus\/xabier-letona\/2009\/05\/28\/eta-publikoki-agertu-da-hausnarketara\/","title":{"rendered":"ETA publikoki agertu da hausnarketara"},"content":{"rendered":"

(ARGIAko 2186. zkian argitaratua)<\/p>\n

\u201cEstrategia politiko-armatu egokia finkatzea\u201d da ETA egiten ari den hausnarketaren helburua eta udarako amaitua izango duela jakinarazi du erakunde armatuak Gara<\/em>ri eskainitako elkarrizketan. Elkarrizketa luzean denetarik jorratzen da, halakoetan ohikoa den legez, baina bereziki azpimarratzen da egoeraren desblokeoa \u201cherri honen eskubideak aintzat hartzen dituzten indarren dispertsioaren amaieratik eta beren aktibaziotik\u201d etorriko dela. Aitortzen du garai luzean desblokeo horretarako EAJren zain egon izan dela, baina jadanik barneratu duela \u201cPNVri itxoiten aritzea alferrik dela\u201d. Alde horretatik, egoki ikusten ditu ezker abertzaleak \u201cbere herri proiektua eta Euskal Herria eskenatoki demokratiko batera eramateko burutu ditzakeen hausnarketa eta argipenak\u201d.
\nAdierazpen hauek guztiak bat etor daitezke azken hilabete luzeetan ildo subiranistaren inguruan egiten ari diren hausnarketekin. Joan den asteko Argian, esate baterako, Sabin Intxaurraga EAko buruzagiak apustu horren aldeko mezua luzatu zuen esanez, \u201cez harritzeko hemendik bi urte barruko Nafarroako zein EAEko foru eta udal hauteskundeetan [ezkerreko alderdi independentisten] eskaintza bateratu bat aurkezten bada\u201d.<\/p>\n

ETAren elkarrizketan, beraz, ez da berrikuntzarik alde horretatik, askotan aipatu baititu halakoak, baina testuinguru politiko honetan, badirudi ezker abertzale osoak berretsi egiten duela EAJtik ezkerrera diren indar soberanisten metaketaren bidea. Beste gauza bat da metaketa hori laguntzeko meniarik eskaintzeko prest ote den, baina prozesuaren \u2013hala hitz egin ote litekeen ere ez dago argi\u2013 hastapen une honetan halakorik argitzea ere gehiegi eskatzea litzateke seguruenik.<\/p>\n

Bi etakideek aitortzen dute, neurri batean bederen, ahuldade operatiboa \u201cETAk ere azken hileotan ez duelako etsaiari min egiteko behar adinako ildo sendorik erakutsi\u201d. Bere ekintzei buruz gutxi hitz egin ohi badu ere, elkarrizketan dio bere garaian hiru aldiz saiatu zela Jose Maria Aznar aurka lur-aire misilez erasotzen, baina hiruetan huts egin zuela.<\/p>\n

\u201cGaueko\u201d eta \u201cArgi\u201d moduan azaltzen diren elkarrizketatuek, halaber, salatzen dute etakideek lehergailuen berri telefonoz ematerakoan, segurtasun indarrek deiak eteten dituztela hauen lokalizazioa egin nahian, eta horrekin arriskuan jartzen dituztela herritarrak. El Correo<\/em> eta Nafarroako Unibertsitatearen aurkako atentatuetan, adibidez, hori gertatu zela azaldu dute.<\/p>\n

Europako hauteskundeetako kanpaina aurrera doa, ia oharkabean bada ere. Europar Batasun osoan abstentzioa oso handia izango dela ez da zalantzarik, eta oro har, partehartzeak ez atzera egitea da agintarien helburu nagusia. Espainian, gainera, Iniziatiba Internazionalista-Herrien Elkartasuna-ren (II-HE) kasua ere hor dago, eta parte hartze txikiak honen ordezkaritza erraztu dezake. Gaitza da jakitea honek parlamentaririk lor dezakeen hala ez, estatuan izan dezakeen sostenguaz ezer gutxi baitakigu. Euskal Herrian legez kanpoko ezker abertzaleak azken urteetan lortutako emaitza onenak bilduta ere 160-170.000 botoren bueltan ibil liteke. Aspaldikoz, hautesleria horrek izan dezake motibazio egokia bozkatzeko, baina hauteskunde hauen giro hotzean jendetza bozkatzera eramatea ere ez da batere samurra. Ekainaren 7an gehien begiratuko diren datuetakoak izango dira.<\/p>\n

Aukera politiko bat da legez kanpoko ezker abertzalearentzat, baina horrek, dena den, ez du inondik inora konpontzen Alderdien Legeak ekarritako eskubide urratze larriak. El Diario Vasco<\/em>k igandean azaltzen zuenez, Auzitegi Konstituzionalak II-HEri buruzko epai honekin Estrasburgoko Auzitegiak ilegalizazioei buruz eman behar duen epaia baldintzatu nahi du, besteak beste, Auzitegiak ezker abertzaleari arrazoia ematea zailduz.<\/p>\n

Jon Anzaren desagerpena ere apurka ari da egiten lekua informazioaren eguneroko agendan. ETAk jakinarazi duenez, Anza bere militantea da eta apirilaren 18an abiatu zen Baionatik Okzitaniako Tolosara, han erakundeari diru kopuru bat emateko asmotan. Baina ez zen heldu, ez orduan eta ez jarritako beste bi hitzordutara ere. Anza espetxean izan zen 1982tik 2002ra eta egun Iparraldean bizi zen. ETAren salaketaren arabera, poliziak bazuen militantzia horren berri eta zuzenean zerikusirik du desagerketarekin. Hipotesi denak airean dira, baina ez litzateke Espainiako segurtasun indarrek desagerketekin zerikusirik duten lehen aldia.<\/p>\n

<!–<\/p>\n