Bizi Baratzea liburua, aurkezpenak herririk herri

Atalak: Liburuak

Baratzeaz ezer ez dakienarentzat nahiz honezkero ari denarentzat balio du liburuak.

Eskarmentu luzea du Jakoba Errekondo paisajistak landareen munduaren berri ematen Euskal Herriko hainbat hedabidetan. Argiako orrialdeetan astero-astero dibulgazio lana egiten hogei urte daramatzan honetan, usurbildarrak baratzezaintzari buruzko jakintza bildu du Bizi Baratzea. Garaian Garaikoa Garaiz liburuan.

Nahitaezkoa zen obra hau, egilearen esanetan. Nahitaezkoa, baratzezaintzan falta zen ikuspuntu bat dakarrelako: Euskal Herriko –batez ere euskal isurialde atlantikoko– ezaugarri berezietara egokitutako liburua da Bizi Baratzea. Modu atsegin eta ulerterrazean, baratzearen abenturan murgiltzeko grina daukatenentzat gida ezin hobea eskaintzen du lan honek, baita dagoeneko lehen urratsak eginda dituztenentzat ere.

Liburua atal labur askotan bananduta dago. Argibide orokorrak ematen dira hasierako zatian; ondoren, kapitulu bana eskaintzen zaio 30etik gora barazkiri. Bakoitza lantzeko lur mota eta sasoi egokiena, ur eta argi beharra, izurriteez babesteko moduak, aldamenean eduki behar dituen lagunak… Baratzean aritzeko behar den oinarrizko jakintza, 200 orrialde inguruan bildua. Hona hemen aurrerapentxo bat (pdf).

Liburua herriz herri aurkezten jardun du Jakoba Errekondok azken asteetan, eta halaxe jarraituko du datozenetan ere. Hauek dira hurrengo hitzorduak:

• Uztailak 18: Igantzi. 11:00etan, lekua zehazteke.
• Uztailak 19: Subilla Gasteiz. Frackanpadako azken eguneko azoka ekologikoan, 11:00etan.
• Irailak 18: Ozaeta. Ordua eta lekua zehazteke.
• Irailak 22: Alegia. Ordua eta lekua zehazteke.
• Irailak 23: Algorta. Egizu! elkarteak antolatutako Uribe Kostako Irakurzaleen Txokoaren barruan. 19:30ean, lekua erabakitzeke (eguraldiaren arabera).
• Irailak 24: Urduña. 19:00etan, lekua zehazteke.
• Urriak 3: Laudio. Aldai plazan, 11:30ean. Aiaraldea Komunikazio Leihoaren 5. urteurreneko jaian.
• Urriak 4: Usurbil. Kilometroak 2015en ibilbidean.
• Urriak 22: Mendaro. Trinidadeko baselizan, 18:30ean.

(Zure herrian antolatzeko, deitu 943-37 15 45era edo idatzi sustapena@argia.eus-era).