Lurrak herria adina behar du lurra herriak

Atalak: Elikadura burujabetza, Elkarlanak

(Argazkia: Dani Blanco)

[Itsaso Zubiria Etxeberria] Lurra herriari deika kanpainaren bigarren kolpea iritsi da. Pandemia garaian jarri zuten martxan proiektua ARGIAk eta Euskal Herriko agroekologia mugimenduak elkarlanean. Kutsatze arriskua zela-eta azokak debekatu zirenean, saltoki handiak irekita mantentzen ziren bitartean.

Erreakzio bat sortu zuen debeku hark eta bertako nekazarien sareari eta zuzeneko salerosketari babesa emateko mugitu zen jende bat. Hori du abiapuntu kanpaina honek, baina ez zen horretara mugatzeko sortu. Kolektiboan lanean jarraitzen dute. Mundua, lurra, larrialdi klimatikoa zuzenean lotzen baitira lehen sektorearekin, eta nekazaritzak momentuko eta etorkizuneko borroka horretan esku hartu beharra baitauka. Agroekologiatik buru-belarri ari dira lanean XXI. mendeko mundu mailako erronka nagusietakoa den honen aurrean eta ARGIAk ere kazetaritza lanetik ikusgarritasuna eman nahi dio mugimendu horri, lurrarekiko errespetuzko jardueran, pestizidarik, kimikorik, toxikorik gabeko nekazaritzan, gertukoan sinesten duelako.

Kamiseta berriak heldu dira azokara. Irudia eraberrituta. Lehenengo logo hartako irudian islatu nahi izan ziren agroekologia hitz potolo horren azpian biltzen diren elementu asko. Detailez betetako deseina. Oraingoan lemari eman nahi izan diote indarra, irudia bera sinplifikatu eta letretan jarriz azpimarra. Euskal Herriko agroekologia mugimenduko kideek beren postuetan jarri dituzte salgai eta azoka.argia.eus-en ere erosteko aukera dago, baita Lasarte-Oriako egoitzako dendan ere. Ateratako dirua ARGIA proiektua eta Euskal Herriko agroekologia mugimendua laguntzeko izango da, etorkizunean ere elkarlanean proiektu berriak aurrera eramateko.

Euskal herriko agroekologia mugimenduarekin elkarlanean, kamiseta berriak kaleratu ditu Argiak; webgunean eta azoketan daude salgai.

Ingelesez munduak amazing dirudien honetan ezagun egin dute Because there is no planet B kanpaina. Ikusi ditugu denetariko produktuak slogan horrekin eta dirudi, baita ere, denok gaudela agree eta involved kausarekin. Baina zer gertatzen da lema hori bera euskaraz irakurtzen dugunean? Hor sortzen dira zalantzak. Politikoki zuzen eta okerrak. Lelo politikoak ote diren edo politikoak leloak. Dena dela ere, lurra herriari deika ari da eta oihu egiten du euskaraz, ingelesezko indar berarekin.