[Itsaso Zubiria Etxeberria] Ez natorkizu XXI. mendeko komunikazio/ez komunikazioaren inguruko diskurtsorik ematera, irakurle. Ez dizudalako ez dakizunik kontatuko. Informazioa lortzeko tresnarik aurreratuenak eskueran ditugun garaiotan desinformazioa nagusi dela ez baita ezer berria. Aitortuko dizuet, oraindik behintzat ez naizela iritsi Siri-ri txiste txar batzuk kontatzeko eskatzetik harago; baina geroz eta ohikoagoa bilakatu da, hatzik mugitu gabe, gure mugikorrari kontsultak ahotsez egitea.
Baina behin aparatuari galdetzen hasita, inportantea da jakitea nori eskatzen diogun informazioa, zein hizkuntzatan egiten dugun, nor dagoen ematen dizkiguten erantzunen atzean, nork entzuten gaituen… Aipatu dut Apple Siri, baina badira Amazon Alexa, Google Assistant edo Microsoft Cortana ere, besteren artean. Denak jabedun softwarea. Alegia, erabiltzaileok ezin dugu jakin gure ahots grabazioekin gailuan zer egiten den eta ez daukagu zerbitzarian gertatzen denaren inongo kontrolik.
Egoeraren aurrean, Mozilla Fundazioak, Firefox nabigatzaile librearen garatzaileak, beste balio batzuetan oinarritutako ahots ezagutza teknologiak sortzeko apustua egin zuen, Common Voice proiektua garatuz.
Besteek etekin ekonomikoei begira ahots laguntzaileak munduko hizkuntza nagusietara mugatzen dituzten bitartean, Common Voice-n helburua da ahalik eta hizkuntza gehienetan erabilgarri egotea. Eta besteek historikoki tresna horiek entrenatzeko ahots gehienak klase ertaineko gizon zurienak erabili dituzten bitartean, Common Voice-n ahots guztiak hartu nahi dira kontuan. Gainera, pribatutasunari emango diote lehentasuna eta emaitza librea izango da, edonork erabiltzeko moduan.
Gure parte-hartzea
ARGIAk eta Iametzak proiektu honetan hartu dute parte. Bi lan nagusi daude honen guztiaren atzean: 5-10 hitz arteko esaldi laburren bilduma erraldoia osatzea, eta hauek irakurri, grabatu eta balioztatzea. ARGIAk esaldi bilduma hori osatzeko bere artxibo historikotik ia 4.000 esaldiko bilduma jarri zuen domeinu publikoan –eta gehiago jartzeko konpromisoa du–. Iametzak, bere aldetik, auzolan digitalean parte hartu zuen bi grabazio maratoi antolatuz.
Datu orokorrak
Une honetan 110 hizkuntzatan ari dira grabazioak egiten eta euskararen kasuan 151 ordu grabatu eta balioztatu dira orain arte, 1.261 boluntarioren lanari esker.
Teknologiarekin ahoz komunikatzea lortzeko, euskaraz, libre eta modu etiko batean, ARGIAren komunitateko kideei gonbita egitea besterik ez zaigu geratzen: https://commonvoice.mozilla.org/eu/ webgunera joan eta esaldiak grabatu edo balioztatu.