[Itsaso Zubiria Etxeberria] Aiton-amona ugari dabil azken egunotan hara eta hona, batzuk zuzenago eta besteak herrenka, baina itsasontziaren mastari eutsiz. Ikasturte amaieraren seinale. Zeharka bada ere, eta ez seme-alabak dauden etxeetan bakarrik, esango nuke denok izaten dugula aldaketaren bat uda iristearekin batera. ARGIAn ere bai? Horixe galdetu diet.
Noski! Izan da erantzuna, eta aldaketak bat baino gehiago. Batetik, etxean haurrak dituztenen ordutegiak aldatzen dira kasu batzuetan –beste batzuek badute aiton-amonak zukutzeko aukera–. Oporrak ere garai honetan hartzen dituzte. Eta zenbait produktu ikasturte naturalari jarraituta antolatzen dira. Esaterako, podcast guztiak gelditu dira. Denek esan dute gero arte, irailean itzultzeko intentzioarekin. ARGIAko kazetari batek baino gehiagok hitz egiten du irratietan, idazten dituzten artikulu eta erreportajeez; eta hauek ere udako geldialdia izango dute. Irakurle fina zarenez, esan beharrik ez dizut, lau asteko hutsunea izango dugu postontzian, astekaririk gabe –eta oporrak udan hartzearen arrazoi pisuzkoenetako bat hau ere bada–.
Baina badira, aiton-amonak bezala, ikasturte amaierarekin azeleratzen direnak ere. Gakoak, adibidez. Aldizkariaren geldialdia betetzera datorren gehigarri mardula azken ukituak jasotzen ari da inprentara bidali aurretik. Eta urte berria oso urruti ikusten badugu ere, ordurako denak martxan segi dezan ARGIAren egutegi takoa eta, batez ere orrialdeen atzealdeak, ari da prestatzen buru-belarri Mikel Urabaien kolaboratzailea. Eta, noski, Internet existitzen denetik, edo behintzat etxe honetan argia.eus sendo baten aldeko apustua egin denetik, makinaria horrek ez du etenik urte osoan eta atal hori da oporrik ez daukan bakarra. Eta, zorionez, webgunea elikatzen, oraindik, pertsonak aritzen direnez –eta ezin direnez aiton-amonekin ordezkatu–, kazetariek txandak antolatzen dituzte erredakzioan beti norbait egon dadin.
Beraz, deskantsuan zaudetenok gozatu ikasturte amaieraz, eta topera zabiltzatenok… ahal dela ere bai. Aiton-amonei, animoak!
