Argazkia: Aitor Alustiza, (Israelgo Gobernuak Zisjordania isolatzeko eraikitako harresia.)
Testua: Mikel Etxaburu, olerkigilea

Gauak dena berdintzen du,
eta askeago sentitzen naiz orduan.
Horregatik nahi nuke ilargirik gabeko gauetan bizi,
ikusteko,
itsuek ikusten duten moduan;
amets egiteko,
haurrek amesten duten moduan;
elkar maite dutenek egiten duten moduan
zu berriz nire besoetan biltzeko,
gauaren babesean.

Gauak dena berdintzen du,
eta askeago sentitzen naiz orduan.
Horregatik ditut maite kandeletako su itsuak,
jakin dezazun hortxe nagoela
zure begien aurrean,
harresiaren alderen batean,
amorruaren itzalean eta esperantzaren malkoetan
zure ondoan,
gauaren orbainetan.

Gauak dena berdintzen du,
eta askeago sentitzen naiz orduan.
Horregatik astinduko ditut suak eta zapiak,
ametsak eta kandelak,
enbatak eta esperantzak,
elkar maite dutenek egiten duten moduan
zu berriz nire besoetan biltzeko
harresirik gabeko gauetan,
herri askearen ilargietan.