Zita berezia igandekoa: Bide Ertzean taldeak Urnietako Sarobe antzokian jo zuen, 77 diskoa grabatu zuten leku berean, Berria egunkaria ekonomikoki babesteko kanpainan lagundu duten herritarrentzat antolatutako saioan.
Kontzertuaren aurretik zenbait bideo eman zituzten, jendaurrean erakutsi gabeko materiala, diskoaren grabazioko irudiak eta ekoizle lanetan aritu zen Suso Saizi egindako elkarrizketa, besteak beste.
Espezial etorri zitzaizkidan Saizek zentrifugagailu eta arnas estuko zakurrak lagunduta emandako azalpenak diskoaren testura ulertzeko: Saroben grabatuz 1970eko hamarkadako diskoek zeukatenaren antzeko soinua lortu nahi zuela esplikatu zuen; horregatik sabai altuko aretoa aukeratzea, hirukoteak jotakoa zuzenean grabatzea eta mikrofoniarekin egindako esperimentuak.
Taldekideen azalpenek borobildu zuten kontzertu aurreko aperitifa eta behin erremintak eskuetan, 77 osoa ia gelditu gabe jo zuten.
Ezinezkoa da, noski, areto berdinean egonda ere diskoko soinua errepikatzea eta are gutxiago telefono ziztrin batekin kontzertuko soinua egoki harrapatzea, baina plazer baduzue, atzoko azken bi kantak (Zenbakiak eta Jaun andreok bihar arte) goiko bideoan ikus-entzun ditzakezue.
Eguneraketa (2014-I-14, 11:16):
Suso Saizen azalpenak jasotzen dituen bideoa, goian aipatzen genuen huraxe, sarera kargatu dute Bide Ertzeanekoek. Hamar bat minutu baldin badauzkazue…
1 Iruzkin
[…] Joseba Lizeagak egin zituen aurkezle lanak eta umoretsu hasi zenez, gure tenplea lasaitzea lortu zuen eta jendaurreko solasaldiari beste aldarte batekin heldu genion. Guk uste baino jende gehiago batu zen, neurri handi batean, Berria egunkariari esker. Euren harpideek doan joateko aukera zuten eta asko izan ziren eskaintzaz baliatu zirenak. Eta beste horrenbeste, euren kabuz agertu zirenak Urnietara. Tartean, Gorka Bereziartua, Argiako kazetaria. Bere blogean kronikatxo bat eta bi kantu eskegi ditu. Hauxe esteka: Bide Ertzean 77 grabatu zuten lekura bueltan […]