Nik orain egiten dut euskaraz, mainstream bihurtu baino lehen

Victor Lenorek argitaratutako liburuko disekzioaren ondoren baten bat tribu urbanoz aldatuko zen, baina, ez gaitezen engaina, hipsterrak, modernoak, antiojopastak baziren, badira eta izango dira; bai behintzat madalenei cupcake deitzen diegun bitartean.
Tendentzia sozial nahiko lausoa da, akaso bere ezaugarri nagusienetako bat taldetik bereiztea delako. Baina tribukideek badituzte puntu amankomunak, sarritan parodiarako baliatu izan direnak –egia esan, oso material ona dira txisteetarako; gaiari buruzko bromen antologia bikaina egin zuten duela urte batzuk gaztelaniaz: “Indie snobaren 69 klixeak”–.
Kontua da, ohiko moduan, joera hau ere gaztelaniaz eta frantsesez –baita ingelesez ere– sartu dela gurean nagusiki. Eta ez da posible. Onartezina da. Euskarak baditu ezaugarriak askoz egokiago egiten dutenak alternatibo, cool eta modernettien lurraldeko hizkuntza ofiziala izateko.
Eta, Euskararen Nazioarteko Eguna badatorrenez, eta egun horretan denek euskara ahotan izango dutenez, fenomeno erabat mainstream eta baztergarri bihurtuz, Aritz Ibañezek eta biok aurrea hartzea erabaki dugu.
Euskara abenduaren 3a baino lehen aldarrikatzera –baldin eta hipsterrek ezer aldarrikatu badezakete– animatu nahi ditugu herritarrak, gaur, orain, gure hizkuntzak lehenbiziko maketa argitaratu duen talde batek baino errekonozimendu publiko gutxiago daukan astelehen honetan.

Nik orain hitz egiten dut euskaraz, mainstream bihurtu baino lehen. Kolore eta taila ugaritan aurkituko duzu Oak Tixertak faktoriaren atarian.