Miarritzeko BIG festibalaren aurtengo edizioan ariko diren lehen taldeak ezagutu ditugu martxoko lehen egunean eta mota horretako beste jaialdi askok azkenaldian eman duten sentsazioa berresteko balio izan du.
The Chemichal Brothers, The Libertines, Prodigy… Oraingoz ezagutzen ditugun kartelburu nagusiak nire adineko jendeak –Y Belaunaldia– nerabezarotik ezagutzen ditu. Ideia bat egin dezazuen, internet gabe bizi ginen aspaldiko garai haietan eta musika elkartrukatzeko kaseteak erabiltzen genituen –bueno, The Libertines iritsi zirenerako akaso lagunen batek Kazaa izeneko programa baten berri emana izango zigun–.
Bai, onartu dezagun: zahartu egin gara.
Baina badago hori baino okerragoa den zerbait: merkatuko segmentu bihurtu nahi gaituzte. 30-40ren bueltan gabiltzanok erosteko ahalmen minimo bat daukagula aurreikusten dute programatzaileek eta eroso sentiaraziko gaituen kontzertu sorta eskaintzen digute. Horrela ari da nagusitzen arrisku handirik ez hartzeko joera, geroz eta nabarmenago, halako jaialdietako karteletan.
“Music, Beach, Food & Fun!” dira BIG festibalaren lau ardatzak. Lerro artean: 2007an lehertutako krisitzarraren aurreko beroaldi ekonomikora itzul zaitez, astebetez baino ez bada ere. Tentagarria izan daiteke eta ez diot inori kargu hartuko plan hori egitea erabakitzen badu. Baina seguru nago uda honetan izango dela lehenago ikusitakoaren errepikapena baino zerbait gehiago eskainiko digun beste kontzerturik.
1 Iruzkin
[…] Williamsez gain, The Chemichal Brothers, The Libertines eta Prodigy 2016ko edizioan bakarrik –zerbait idatzi genuen artistak aukeratzean hartutako zero […]