Edo antzeko zerbait oihukatu nuen estekan sakatu bezain laster, Alexandriako liburutegi digante hura etorri baitzitzaidan burura –ez dauka azken egunotako Egiptoko istiluekin zerikusirik post honek– weba argitu zitzaidanean. Armiarma.com-ekoek egin dutela egin, berriro ere: 248 e-liburu (edo liburu-e) jarri dituzte PDF eta EPUB formatuetan doan. Euskal literaturaren klasikoak batzuk, Etxeparetik Mirandera; nazioarteko klasikoak besteak, Literatura Unibertsala bilduman publikatuak tartean. Lerde-jarioa gelditzean irakurgailu bat erosi beharko. Zein? Tablet bat? Liburuak bakarrik leitzen dituen gailua? Modelo hibridoren bat? 2011 honetako galderetako bat izango dela uste dut, eta momentuz ez daukat erantzunik.