— Aizak, San Joan Batailatzailearen kontu hori aspaldi asmatua zegok! —esan dit lagun batek telefonoz, joan den astean hemen zintzilikatu nuen ohar batez hizketan. Eta egia da: Google-en bilaketa eginda mordoxka dira hiztripu horren adibideak. Arrazoia, ziurrenik, “LL” soinua ahoskatzeko askok daukaten arazoa, eramaten dituena “Y” esatera, eta San Joanen izena liskartzera.
Dena dela, akatsak oraingoan utzi du esanahi sakonago bat, Apoaren edertasunan Koldo Izagirrek proposatzen zuen beste istripu poetiko haren tankerakoa (Lizardiren “egur hezearen kea” aldatzea, Hezur hezearen kea bihurtzeko).
Gogoan dut behin kolaboratzaile batek bidalitako testu batean “zaintasun” hiztripua aurkitu nuela. Zalantza izan nuen, bere horretan utzi-ez utzi: egoera zainak tenkarazteko modukoa denean, zaintasunak izaten baititu pertsonak, eta ez ohiko zailtasunak.
Horrelako gehiago non aurkituko, Jozulinen post- batez akordatu naiz, zaharra, antzinakoa ia, 2006koa. Ikasleak poesian zortzimilakoak egiteko gai direla erakutsi zuen Jozulinek ordukoan. Gaitasuna, ez dago esan beharrik, nahi gabe edukitzen da.
Adibidea, ariketa bat:
Lotu esaldi biak erlatibo baten bidez:
Aitziberrek soineko berria erosi du. Zuloz beteta dago.
Zuloz beteta dagoen Aitziberrek soineko berria erosi du.
Gehiago Jozulinen Baga, Biga, Blogan.
1 Iruzkin
“Biblioteta” ere ez da hiztripu txarra…