Harri sakratuen lurraldea

Atalak: Egunerokoa, Kolonbia

Kaiman bat lotan harri sakratu baten alboan.

Tairona parke naturaleko itsasoko ur bero eta gazietan flotatzen, ekaitzaren erdian nago etzanda. Zeruan hodei grisek marrazten duten amildegitik milaka tanta hotz eta gozo sentitu ditzaket nire gorputza kolpatzen. Olatu finek kulunkatua, trantze moduko batean murgildu naiz eta iluntzean bakarrik konturatu naiz gisa horretan pasatako denbora luzeaz.

Bitxi izan da, baina Bogota atzean utzi nuenetik euria nire bidai lagun fidelenean bilakatu da. Atzo Santa Martara uholdeen erdian iritsi nintzen eta kaleak ura izterretaraino nuela ibili nintzen deskubritzen. Gaur Taironara iritsitakoan, euriteez gozatu duen bakarra ni ez naizela izan ikusi dut, han pozez gainezka kolore fosforeszenteko igelak baitzeuden.

Ekaitza Tairona kostaldera hurbiltzen.

Tairona Herriarentzat oihanean eta kostaldean sakabanatuak dauden harriak sakratuak dira. Sinesmen hori ulerterraza da, izan ere, harri hauek duten forma borobilduak hausnarketarako abagunea ematen diote begira dagoenari. Ziur nago hausnarketa horrek harrapatu nauela uretan nengoenean.

Ekaitzaren biharamunean ur korronteek hondartzara ekarritako kaiman bat ikusi dut harri sakratu horietariko baten alboan. Kaimana hausnarketan edo lotan egon behar zuen, ez baita konturatu gutxigatik ia burua zapaldu diodala.