Master bat eta bi lekZIO

Multimedia komunikazioa masterra egin dut 2009-10 ikasturtean EHUn. Ikasi dudana asko da, bai masterrean eta bai masterretik kanpo. Masterrean bertan denetarik ikasi dut, askotan sakontasun handirik lortzeko aukerarik gabe, baina baliagarria izan da guztia niretzako; ikasle bizitza gogoratzeko karpeta besapean, ikerkuntzan aritzeko, lagun berriak egiteko… Masterretik kanpo ikasi dut lana egin eta ikasten arituta, horixe bakarrik egin daitekeela: ikasi eta lan egin. Eta horrek osasun arazo larri zenbait ere sortu dizkit. Bi lekzio beraz master bakarrean.

Kontuak kontu, egindako lanak asko izan dira. Horietako bat azpimarratzekotan, euskal gazteentzako pentsatutako proiektu multimedia aipatuko nuke, etorkizuneko kontsumitzaileak mundu digitala sorreratik bertatik ezagutzen dutenak direlako, eta horiengan pentsatu beharra daukagulako euskarazko produkzioan. Eta bestea, ostegun honetan epaimahaiaren aurrean Leioako campusean azalduko dudan proiektua, masterreko azken lana: Euskarazko literatur testuak sarean: folksonomia baterako proposamena.

Segidan, erabiliko dudan aurkezpena jarriko dut, lanaren nondik norakoa zein den jakiteko. Hitz bitan esateko, euskaraz sarean literaturarekin zerikusia duen gune oro identifikatzea eta sailkatzea da helburua. Ondoren edozeinek ikusteko eta kontsultatzeko moduan jarri nahi da egitasmoa, erabiltzaileek ere euren ekarpenak egiteko moduan. Zuek esan interesekoa zaizuen edo zer aldatuko zenuketen, lan honek euskara jendearentzat baliagarria izan nahi du, eta ez kaxoian karpeta batean geratuko den lan bat. Horixe besterik ez. Eta horixe guztia.

OHARRA: azken emaitza oraindik ez dago kontsultagai. Egitasmoa baino ez da hau. Hurrengo hilabeteak egitasmoa egitate bihurtzen ahaleginduko gara. 2011. urte hasierarako egongo da prest biltegia.