Zer da sinestesia?

Atalak: Abestiak, Hitzak

Gaurkoan ez dut hitzik marraztuko. Gaurkoan ez dut abestirik margotuko.

Gaur ZERGATIK marrazten ditudan azaldu nahi dut.

Mundua,  errealitatea, hor kanpoan dagoena …  norberak barnetik eraikitzen du eta arras subjektiboa, pertsonala, da. Hala ere, txikitatik irakasten digute bost zentzumen ditugula kanpoan dagoenaz jabetzeko edota errealitatea hautemateko. Horregatik, usaimenaz, dastamenaz, ikusmenaz, entzumenaz eta ukimenaz baliatuz, gutxi gora behera denok nolabaitere barneratzen dugu inguratzen gaituena antzeko moduan jasotzen dugula. Baina…hori horrela ez balitz?

Pertsona batzuei zentzumenak nahasten zaizkigu. Sinestesiadunak gara. Zer esan nahi du horrek? Kanpotik estimulu bat jasotzen dugunean,  horri dagokion zentzumenarekin jasotzeaz gain, beste zentzumen baten informazioarekin ere jasotzen dugula errealitatea. Zentzumen nahasketari sinestesia deitzen zaio  eta dokumental baten berri eman nahi dizuet.

Valentziako Unibertsitateko ikasle batzuk sinestesiari buruzko dokumental bat egin nahi zuten eta horretan parte hartzeko eskatu ninduten. Horregatik dokumentalaren zatitxo batean nire marrazkiak ageri dira, baina interesgarriena sinestesiaren inguruan bildu duten informazioa da. Beraz, dokumentala ikusteko gonbitea egiten dizuet. Gazteleraz dago, baina Luistxo Fernandezen laguntzari esker bion artean euskarazko azpitituluak sortu ditugu, eta euskaraz jasotzeko aukera duzuenez ere, badago aitzakiarik? Jakinminez gose bazarete… on egin!

Oharra:  ARGIAn bildutako marrazkiez gain, 2012. urtean hasitako sinestesia artxiboa hemen ikusgai.

Eskermila ere GAUR EZ taldeko kideei dokumentalarentzat beraien abestia uzteagatik eta Julen Durandegiri, beti ondoan egoteagatik.