Sanferminak eta garagardoa

Atalak: Arantzadikoak, Ez gara hutsaren hurrengoak, Iruñeko ferietan

Bagurrin esaten zioten gazteleraz Iruñerrian. Garai batean iparra sartzen zelarik Imotz aldeko pagoen urrina hedatzen baitzen hiri buruzagiaren eremura, ez naiz ni adituena afera horretaz, Jeremias Erro, Ultzurrun edota Ibañezek maiz eta ongi jorratu baitute gai hori. Pago urrina aspaldi desagertu zen gurean, eta atzokoan ilunabarreko iparrari gari urrina zerion.

Egun uzta, gari edota garagarrarena, sanferminetarako akitzen baita, eta ez bakarrik Iruñerrian, igande honetan makineriarik ez zen falta Allinibarreko larre eta zelaietan. Ez aspaldi garagardo marka batek harrotasunez publizitatzen zuen nafar garagarraz eginiko edariarena.

Uztailaren 4a da eta sanferminen aurreko giroaz disfrutatzera hurbildu naiz alde zaharrera. Arratsaldeko azken orduak dira eta erraz topatu dut norekin solastu, norekin tragoa egin. Nabarrareriaren atarian Martinekin egin dut topo. Martin, besteak beste, garagardo kontuetan da aditu, egina du garagar onaren ibilbidea eta horretan ez da falta

Koxkatik kaleratutakoen garagardoa .

Kalean gara eta niri egokitu zait erronda ateratzea, edaten hasi da Martin eta deblauki bisaia aldatu zaio

 -Kaben dena, heldu duk Sanferminetako garagardoa. Hona ez gaituk itzuliko festak akabatu arte. Destainez bota du irekia berria den ostatuari begira.

 Martin elektrikaria da, baina lanbide heziketa ikasten ari zela biltegi batean aritu zen lanean uda batez. Edariak banatzen zituzten, garagardoa nagusiki. Martinek gogoan du sanferminak ailegatu baino bi aste lehenagoko eromena, ostatuak hornitu behar zituzten. Nagusiarekin izandako elkarrizketa bat berritu digu. Banatzailearen biltegia handia omen zen eta barrilez mukuru zegoen, halere nagusiaren agindua garbia izan zen.

Txukundu beharra

 -Barril hauek ezta ukitu ere. Bihar bi trailer helduko dira, bata Zaragozatik eta bestea Gasteiztik, horiek dakarten garagardoa da banatu behar duguna.

 Badakizue, logistika, sanferminak, mozkinak, festa hauetan maiz edan baino edaria botatzen dugu, eta horren jakitun dira banatzaile eta ekoizleak. Sanferminak, biltegia garbitzeko aukera ezin hobea haientzat. Iraungitzear diren edariez blaitzen da hiri buruzagia.

 Nabarrerian hartu dugu bigarren potea, Martinek ardura osoz aukeratu du ostatua, kalean segitzen dugu, ondoan furgoneta txiki bat dugu, bi litroko botilez enpo, kola da, auskalo nondik heldu den freskagarri santu hori. Orain Martinen semea Haritz hurbildu zaigu. Heletatik etorri berria da Haritz, estrainekoz egon da EHZ festibalan. Txundigarria iruditu zaio antolakuntza. Ba da aldea bi festen artean.

 Iluntzen hasi du, Frantziako ataria hartu eta etxeruntz abiatu naiz Arantzaditik barna. Gari urrina dario iparrari, bihar okaztagarria izanen da alde zaharreko usaina, baina festen aitzakian dena omen da zilegi.