2006tik sare sozialak: Estrategia eta komunitatea

argia
0

[Miren Osa Galdona] XXI. mendearen lehen urteetan zabaldu zituzten hedabide nagusiek sare sozialetako lehen profilak, komunikazioaren ildo berria nondik joango zen aurreikusi nahian. Multimedia indarra hartzen hasi zen komunikabide tradizionaletan, eta Youtube izan zen lehen eztanda haren onuradunetako bat. Tendentzia berria baliatuz, ARGIA ezagutzera emateko estrategia bikaina izan zitekeela pentsatu zuten erredakzioan, sarean euskara hutsean presentzia irabaziko lukeen lehen medioa izateaz gain, irakurle berriak erakartzeko bide izan baitzitekeen. Aurreko astean azaldu genuen Evo Moralesen bideo elkarrizketa hura igotzeko ireki zuen ARGIAk lehen kontua sare sozialetan, Youtuben, Sareko Argia izenean. Bide oparo baten lehen urratsa izan zen.

Youtuberen ostean iritsi ziren Facebook eta Twitter, eta hasieran egunean albiste bat baino gehiago argitaratzeak “lotsa” ematen ziela onartu arren, Lander Arbelaitzek dio konplexuak kendu ahala sare sozialen garrantzia ere handitzen joan dela: “Lan egiteko modua aldatu digute, dudarik gabe, gaur egun albiste guztiak argitaratzen ditugu sare sozial batean zein bestean. Potentzial handia daukatela ohartu ginen”. Lan talde osoa trebatu zen han eta hemen ARGIAko edukiak argitaratzeko, eta Twitterreko kontu korporatiboaz gain, kazetari bakoitzak bere kontua zabaldu zuen. “Lanketa gehiena Twitterren egiten dugu, baina bisita gehien Facebooketik datozkigu”. Geroago Instagramen ere muturra sartu zuten argiatarrek eta asteko argazkia, azala eta bideoak jendartean zabaltzeko erabiltzen dute.

Halaber, badira zulo ilunak ere: gutxi batzuen jabetza pribatuko plataformak dira arestian aipatutako sare sozialak, eta irakurle-hedabideen arteko dependentzia handia eragiten dute: nahikoa da Facebook edo Twitterrek etorkizunean baldintzaren bat edo beste aldatzea, ARGIA k sareon bidez bere komunitatearekin duen lotura eten ahal izateko. Burujabeago izateko, alternatibak garatu ditu ARGIAk aspalditik. Email bidezko buletina bidaltzen diete egunero 3.000 laguni, eta Telegrameko kanaletik ere informazio garrantzitsuena helarazten zaie taldera atxikita daudenei. Telegrameko kanalean jarraitzaile gehien dituen euskarazko hedabidea da ARGIA. Mastodonen ere kontua du, euskarazko sare sozial libre eta deszentralizatua.

Publiko zabalago batengana iristeaz gain, irakurleen adin tartea ere “nabarmen jatsi” dela dio Arbelaitzek, gazteengana hurbiltzeko bide zuzena baitira. Lehiakortasuna ere, nolabait, murriztu egin da, tresnon bidez hainbat kasutan hedabide hegemonikoen “pare edo gorago” egon baitira aktualitateko hainbat gai jorratzeko orduan, M8ko greba feministak eta Herri Harresiak, kasu. Kataluniako independentzia prozesua jarraitzeko ere funtsezko baliabideak izan dira: irakurle andanak bidali zituen argazkiak eta bideoak Bartzelonako kaleetatik urriaren 1eko erreferendumaren egunean, adibide bat ematearren. Argia Jendeak egiten du posible aldizkaria astez aste kaleratzea, eta sare sozialak elkarrengandik gertuago egoteko bide ere izan daitezkeela erakutsi du denborak.

Utzi erantzuna

Zure e-posta helbidea ez da argitaratuko. Beharrezko eremuak * markatuta daude

Gune honek Akismet erabiltzen du zaborra murrizteko. Ikusi nola prozesatzen diren zure erantzunen datuak.

ARGIAko Blogarien Komunitatea - CC-BY-SA