Gakoak Euskal Herritik munduari begiratzeko

argia
0

[Itsaso Zubiria Etxeberria] Ez da erraza mundua nondik nora dabilen ulertzea. Niri sarri kosta egiten zait. Eta daramagun abiaduran, oraindik eta detaile gehiago galtzen zaizkit bidean. Informazioaren garaian uste dut inoiz baino desinformatuago gaudela, gaituztela, eta zein inportantea den egunerokoan bosgarren martxa sartuta goazenean frenoari sakatzeko ariketa egitea. Zenbat kostatzen den erdiko pedala bilatzea. Ea honek laguntzen dizun, irakurle.

Entzun izan dut ARGIAren irakurleen artean, lasai leitzeko aldizkaria dela; gaurkotasunez bustia, baina egunean eguneko albisteetatik ihesi, patxadaz begiratzekoa. Orain lau astez oporretara goazenez, ez da asmoa inor irakurgairik gabe uztea eta zerbait mardulagoa, sakonagoa den liburu bat eskainiko zaie harpidedun denei urtero moduan: Aktualitatearen Gakoak (artikulu honetan Miren Osa Galdonak ongi azaldu bezala). Iraganean otsailean plazaratzen zen Urtekaria du arbaso, garai batean euskal kulturaren urteko errepasoa egiteko sortua, eta funtzioa agortu zitzaiolako edo garaiak aldatu zirelako, beste buelta bat eman zitzaiona hainbeste kronologikoki pasatakoari begiratu beharrean aktualitateari eta etorkizunari begira jartzeko asmotan. Eta zein garai hoberik abuztua baino, oporrak izan edo ez, ikasturteko erritmotik aterata ARGIAko kazetari eta kolaboratzaileen elkarrizketa, erreportaje eta analisiak lasai irakurtzeko?

Diseinua berrituta dator aurtengo liburukia. Azalean, udan Biarritzen bilduko den G7a. Sarean dagoeneko ikusgai dago portadan jasoko den Xabier Sagasta Lacalleren ilustrazioa. Etxe honetako kolaboratzaile den Asier Blas politologoak G7aren inguruan egindako analisia irakurri ahal izango dugu, eta dagoeneko goi bilera hau salatzeko egindako deialdien egitaraua ere jasoko da liburuan.

Ez dizkizut kontatuko aldizkari berezian topatuko dituzun gaiak, zuri utziko dizut ezagutzeko plazera. Bakarrik errepikatuko dizut Gakoak-en lehen orrian sarrerak azaltzen duena: “Gure elkarrizketak, kezkak, gure pentsamenduak enpresa handi eta bankuenak diren hedabideek ezarritako markoetatik ateratzen laguntzeko aldizkaria duzu 2019ko Aktualitatearen Gakoak”.

Esandakoa, sakatu frenoa, moteldu abiadura eta, udan (ahal baduzu neguan ere bai), gozatu patxadaz.

Argia Jendeak etxean jasoko dugu aurtengo Aktualitatearen Gakoak. Egin Argiakoa uztailaren 25a baino lehen, zuk ere etxean eskuratu nahi baduzu.

Argia Jendea ez bazara, Azokan eros dezakezu 2019ko Aktualitatearen Gakoak.

Utzi erantzuna

Zure e-posta helbidea ez da argitaratuko. Beharrezko eremuak * markatuta daude

Gune honek Akismet erabiltzen du zaborra murrizteko. Ikusi nola prozesatzen diren zure erantzunen datuak.

ARGIAko Blogarien Komunitatea - CC-BY-SA