Etxe bakoitzak bere deskonfinamendua

[Itsaso Zubiria Etxeberria] Galderak aldatu egin dira azken bi asteotan. Beste fase batean gaude –irakurlea gehiago nahasteko intentziorik gabe, ez naiz ari Bidasoaren hegoaldekooi behintzat hain ezagun egiten zaizkigun lau fase zirraragarri horiez–. Hasi gara lanera bueltatzen, herrietako komertzio eta taberna batzuk ateak ireki dituzte… Baina nola antolatzen ari da etxe bakoitza baldintza eta neurriz jositako deskonfinamendu hau? Argian badirudi jendeak gustua hartu diola etxeko egongelan pijama jantzita lan egiteari.

Zuzendaritza taldeak gutun bat igorri die Lasarteko pabiloian lan egiten duen kide bakoitzari, lehentasuna taldekideen eta beren ingurukoen osasuna bermatzea izanik, galdetuz nola jarraitu nahi duten lanean datozen asteetan; etxetik ala Lasartera joanez. Bakoitzaren egoera oso desberdina izan daitekeela jakitun, aukeran jarri dute; batzuk gustura ariko baitira etxetik, eroso, baina beste batzuk beharko dute, akaso, etxetik atera eta lantokira joatea. Eta aukera hori izatea, momentu hauetan, ez da gutxi.

Lantokira itzulera zehaztu gabe

Etxetik jarraitzea erabaki dute. Bai ekainaren 1era arte, behintzat. Hortik aurrera, ikusi egin behar, ez dago ezer zehaztuta. Etxetik aritzea lehenetsi badute ere, nahi duenak joan ahal izango du Oriako pabiloira. Bertaratzeko asmoa duenak, hori bai, abisua pasa beharko dio zuzendaritza taldeari. Helburua da momenturo jakitea zenbat jende dagoen bertan, pilaketarik ez sortzeko; eta nor norekin dagoen, kideen artean kutsaturik detektatuko balitz, lehenbailehen jakin ahal izateko norekin izan duen kontaktua.

Asmoa ez da inbertsio ekonomiko handiegirik egitea, babes neurriak zaintzeko materialetan. Zorionez pabiloiak espazio handia du eta jokoa ematen du langile bakoitzak beharrezko dituen segurtasun distantziak sortzeko. Lantokian sartzen direnerako prest dituzte eskularruak, maskarak eta desinfektatzeko gela, eta bakoitzak ere arduraz jokatu beharko du lantokian; garbitzaileak bere lana egingo du, noski, baina norberak zaindu beharko du bere txokoa, mahaia, aulkia eta erabilitako tresnak.