ARGIAn astekaria banatzeko modua aldatzen hasi gara, eta lehen pausoa Gasteizen eman dugu. Correos posta zerbitzuak egiten zuen lana Eraman kooperatibak egingo du aurrerantzean, bizikletan. Dagoeneko bi zenbaki banatu dituzte Arabako hiriburuan.
Arazo handiak izan ditugu Correosekin denbora luzez. Ez bakarrik Gasteizen, baina han ere bai. Etxe askotara berandu iristen da, oso gutxi dira Euskal Herrian aldizkaria asteazkenetan jasotzen dutenak; beste askok asteburuan jasotzen dute, Ipar Euskal Herriko lagunek oraindik eta beranduago jasotzen dituzte aldizkariak, eta badira aste batean batere ez eta hurrengoan bi batera heltzen zaizkienak ere. Ez da beti hala izaten, baina arazoak dauzkazuenoi, mesedez, guri jakinarazteko eskatu nahi dizuegu harpide@argia.eus helbidean, horrela guk kontuak eska ditzakegu ordaintzen dugun zerbitzuagatik.
Horrez gain, burujabetza ikuspegitik ere beharrezko ikusten dugu halako pausoak ematen hastea. Informazio burujabetzarik ez da prozesu osoa kontrolpean izan gabe, informazioa sortzen den unetik hartzailearengana heltzen den arte. Katalunian 2017ko urriaren 1eko erreferendumak argi erakutsi zigun guri ere zer gerta dakigukeen egunen batean alternatibak pentsatu ezean: Correosek L’Eco de Sitges astekaria bere harpidedunei ez banatzea erabaki zuen erreferendumari buruzko azala zeramalako aldizkariak. Correos Espainiako Estatuko posta zerbitzu nazionala dela, ondorio guztiekin, bergogoratu ziguten. Ezin ginen besoak gurutzatuta geratu.
Ez da erraza, ordea, alternatiba handiak bilatzea. Baina, ohi bezala, txikitik hastea badago. Eta, hala, Gasteizen, aurkitu dugu bidea: banaketa-lanak egingo dituen kooperatiba sortu dute, Eraman. Nor eta etxe honetako Paul Iano kolaboratzailea tartean. Badu esperientzia bizikleta gaineko banaketan. Oroitzen ARGIAk publikatu zuen Glovo banaketa enpresan infiltratuta lanean aritutako gaztearen testigantza? Iano bera da kontakizuneko laguna. Telepizzan ere aritu zen gero. Gustuko du lana, baina enplegu duina aldarrikatzen du.
Aldizkaria etxeetara ahalik eta lasterren ailegatzea izan da beti ARGIAren ametsa eta honekin lortu egingo dugu. Langileentzat bizi-baldintza duinak bermatuko dituen kooperatiba bat sortzen lagunduko du gainera erabaki honek. ARGIAk bere ingurumen inpaktua nabarmen jaitsiko du, bizikletaz egingo baita banaketa, CO₂ gehigarririk sortu gabe. Oso pozik gaude.
Oraingoz Gasteizkoak nola funtzionatzen duen ikusiko dugu, baina dagoeneko ari gara Bilbo eta haren inguruko herriei erreparatzen; han ere antzeko aukerak suerta baitaitezke.
Eskerrik asko ARGIAren independentzia bermatzen duzuen guztioi. Eta zuk ere, ARGIA proiektua eta antzeko praktikak babestu nahi badituzu, azpian duzu ARGIAkoa egiteko lotura. Azken hilabeteetan ehunka dira pausoa ematea erabaki duten kide berriak, ikusi hemen Argia Jendearen arrazoiak. Animatu zu ere, zenbat eta gehiago izan, orduan eta kazetaritza hobea egiteko aukera izango dugu!
EGIN ARGIAKOA
Jaso besarkada estua ARGIA egiten dugun guztion partetik.