[Itsaso Zubiria Etxeberria] Erosketak egiten nabilela nonbaitetik datorkit, apal-apal, Hemen zizurkildar bat doinua. Baina nondik ote dator? Kosta zait bertsoaren iturria topatzea! Hara non, azalorerik ederrenaren bila dabilen eroslearen belarrian detektatu dudan ia ikusten ez den aurikularra. Entzun berri den bertsoa aztertzera pasa dira ahots batzuk eta nire ondokoak buruarekin baiezkoa egiten du, arrazoi dutela. Kuriositatez galdetu diot zer entzuten ari den. BTLN, erantzun dit lehor –lehor eta altu xamar nire gusturako, aurikularrak kendu gabe–.
Asteartea da, urriak 27, eta asteburuan Lekunberrin izandako Euskal Herriko Bertsolari Txapelketako final laurdenetako bertso-saioaz egindako lehen saioa atzotik dago ikusgai argia.eus atarian. Podcastetan. Hemendik aurrera eta abenduaren 20ko finalera arte, astelehenero iluntzeko 20:00etarako zintzilikatuko da saio berri bat. Oihana Arana, Asier Galarza, Lide Arregi eta Danele Sarriugarte ariko dira tertulia formatuan ARGIAko platoan. Edizioan Eneritz Arzallus. Freskotasunarekin dator aurtengoa ere, duela lau urteko BTN formatuari jarraituta. Baina konparaketak egiteko tentazioa duenari esan, ez dela BTN 2.0. Horregatik sartu diote L-a ere izenburuan. Platoa kotxe bihurtuta, irudikatuko dute bertso-saio batetik etxerako buelta eta, bide batez, gogoraraziko digute planeta ez dagoela isuri askorako eta ahal dela saioetara kotxeak beteta joateko; joan-etorriak, lagunartean ere ederragoak dira. Joko handia ematen dute, batez ere bidean galdutakoan, maps-ek koberturarik gabe, eta gure orientazioak jada koberturarekin ere, funtzionatzen ez digutenean.
Umorearen eta seriotasunaren artean
Hor ibiliko dira dantzan. Umore sekzioak izango ditu, noski, baina saioak eta bertsoak aztertuko dira, analisi sakonak espero dira, beste begirada batetik egindako hausnarketak… Katxondeoa baino zerbait gehiago izango dela, alegia.
Astearte goiza da, erosketak egin berri ditut eta etxeraino noa Hemen zizurkildar bat doinua burutik kendu ezinda. Nik ere multitasc izaten hasi behar dut. Nik ere nahi dut modan egon. Bukatu da erosketak egiterakoan hori bakarrik egitea. Bi egin daitezkeenean gauza bakarra egitea oso randoma da. Ze denbora galtze da hau? Denda batetik bestera pasa dudan ordubete honetan jada entzunda eduki nezakeen irratsaio bat. Eta txakurra paseatzearena ere kito, hemendik aurrera ordu erdi hori korrika egiteko aprobetxatuko dut, sokatik elkarri lotuta. Podcast bat entzunez, noski. Bukatu dira alferkeriak!
