Landakoren birikak

argia
0
Durangon, Landako gunean, sei mahai izango ditu ARGIAk bere proiektua azaltzeko, produktuak saltzeko eta komunitatearekin gertuko harremana eduki ahal izateko. Argazkia: Gorka Peñagarikano / ARGIA CC BY-SA

[Itsaso Zubiria Etxeberria] Beldurtuta nago, irakurle. Ez dakit aurten zer aurkituko dugun Durangon. Esan didate Euskal Herriko zuhaitzak eta arbolak bertan izango direla eta Jakoba Errekondo kapaz ikusten dut azken urteetan ARGIAren erakusmahaietan hain ezagun egin diren kanaberak ipurditik atera eta leku horretan pago eta lizarrak sartzeko. Landakoren birikak. Letxugen partez astigar kumeak banatzeko.

Adarjotzeak alde batera utzita, gainean dugu Landakoko zita eta punta-berrituta dator, aurten ere, Bizi Baratzea lantaldea. Zuhaitzek eta arbolek hartuko dute beraientzat mahai oso bat –Bizi Baratzeak hiru mahai izango ditu eta ARGIAk orotara sei– eta bertan izango dira, nola ez, Jakoba Errekondo, Markel Arriolabengoa eta Iñaki Etxebeste, liburuaren egileak. Ondoan izango dute Garbiñe Larrea sendabelarrez dakiena azaltzeko. Bizi Baratzea proiektuko kideen helburua Durango “komunitatearen topaleku izatea” da. Eta komunitate hori zabaltzeko asmotan jarri dute martxan Egin Bizi Baratzeakoa kanpaina. Funtsean, harpidetza kanpaina bat, ARGIAren filosofiari jarraituta: nahi duzuna jaso, nahi duzuna ordaindu. Baliagarri izan daitekeelakoan, erreferentziazko prezioa ere jarri dute: urtean 25 euro. Eta horrekin, paperean jaso dezakezu urtaro bakoitzeko Bizi Baratzea Orria, lurraren aktualitatea jarraitzeko erreminta baliagarria. Dena den, kanpaina nik baino askoz hobeto kontatuko dizuete Durangoko Azokan lantaldeko kideek.

Eta beste hiru erakusmahaiak zer?
ARGIA ez da bakarrik Bizi Baratzea, eta Durangon aurkitu ahal izango dituzu udaberrian plazaratutako Oker habil Makiavelo, Ategorrietan Fisterra eta Turismoa: desazkundera bidaia liburuak; nola ez, 2027ko egutegi takoa; Data-zarta: bertsolariak, mahai jokoa; ADI kartak; eta erraldoi eta buruhandien puzzlea. Baita aurreko urteetan argitaratutako hainbat liburu, jolas, eta abar ere.

Bestalde, harpidetza mahaian prest egongo dira ARGIA Jendea beso zabalik hartzeko. Astekariak mahai gainean izango dira, proiektu komunikatiboa gutxi ezagutzen duenak gertutik ikus dezan eta harpidetza eredua ere azalduko zaio nahi duenari. Nola ez, han bertan harpidetzeko aukera egongo da. Mahaian bertan astekariak hostokatzeko astirik ez duenak etxera eraman ahal izango du eta sei mahaietako edozeinetan erosketaren bat egin duenak ere, zorroan eramango du ale bat.

ARGIAko lantalde osoa bertan izango da, gerturatzen denari proiektu osoaren berri emateko, proiektua ondo ezagutzen duenarekin solastatzeko, ideiak eta iritziak komunitatearekin partekatzeko. Zuhaitz handiaren magalean, zuekin arnasa hartzeko gogoz.

Inor ez da ilegala, Goienkale 7n

ARGIAk Inor ez da ilegala denda irekita edukiko du Goienkalen, 7. zenbakian, hau da, Durangoko Azokara doazen guztiak giro bila joaten diren kaleetako batean. Altxa burua eta bilatu Inor ez da ilegala dioen kartel argitsua denda atarian.

Inor ez da ilegala proiektua 2018an abiatu zuen ARGIAk Mbolo Moye Doole elkartearekin batera. Elkarteko kideak Bilboko kale-saltzaileak dira, migratzaileak, gehienak Senegaldik etorritakoak. Inor ez da ilegala leloa daramaten arropak eta poltsak ARGIAk eta Mbolo Moye Doole elkarteak saltzen dituzte eta ARGIAk bere salmentetatik migratzaileen elkarteari ekarpen ekonomikoa egiten dio.

Proiektuak Bilboko Poliziaren jazarpena, arrazismoa eta xenofobia salatu nahi ditu.

Utzi erantzuna

Zure e-posta helbidea ez da argitaratuko. Beharrezko eremuak * markatuta daude

Gune honek Akismet erabiltzen du zaborra murrizteko. Ikusi nola prozesatzen diren zure erantzunen datuak.

ARGIAko Blogarien Komunitatea - CC-BY-SA