1963-1979 Inocencio Bujanda Sarasolaren artikuluak

[Miren Osa Galdona] Sorpresa oso ederra jaso zuten uztailaren erdialdean ARGIAko erredakzioan: Jose Manuel Bujanda Arizmendik sinatutako gutuna. Inocencio Bujanda zenaren semea da Jose Manuel, Zeruko Argia-n 16 urtez artikulu andana idazteaz arduratu zen idazlearena.

Duela bost urte zendu zen Inocencio Bujanda Sarasola, 98 urterekin. Semea jakitun omen zen aitak Zeruko Argia-n idatzitako artikulu guztiak txukun gordeak zituela, ezin jakin non, ordea. “Eta gaur bat-batean eta ustekabean nire etxeko armario bateko kaxoi batean karpeta zaharkitu bat aurkitu dut… eta hara!”, dio idatzian, ezkutuan zegoen altxorra aurkitu zuen unea azalduz. 78 artikulu dira guztira, eta boligrafo gorriz idatzitako zenbaki bana dute denek. Eskuzko makina batean idatzitako zerrenda bat ere bada artikuluon artean, “Zeruko Argia”n agertutako idazlanen zerrenda dioena. Bertan ageri dira lan guztien izenburuak, argitaratze data, baita aldizkariaren ale zenbakia ere. Lehen artikulua (Mundua. Begiratu berri bat), esaterako, gerraosteko Zeruko Argiaren bigarren alean kaleratu zen (1963), eta azkena, berriz, Kaputxinoek aldizkariari agur esan baino urtebete lehenago, 833. alean, 1979ko ekainaren 10ean. Argitaratutako errenkada kopurua ikusita, Bujanda Zeruko Argiaren bigarren aldiko pisuzko kolaboratzailea izan zela inork gutxik eztabaidatu dezake, ia hogei urtez aldizkarirako makina aurrean jartzeak meritu handia baitu. I.B.S siglez. I. Bujanda izenez edo Bujanda abizenez soilik sinatzen zituen lanak.

Francoren diktaduraren azken urteetan, eta haren heriotza osteko aldian idatzi zituen artikulu gehienak Inocencio Bujandak. Euskal Herriaren egoera politikoaz kezkatuta, asko izan ziren gaia jorratuz idatzitako lerroak. Euskararen etorkizunak ere ezinegona eragiten ziola antzeman daiteke, baita euskaldun izaera definitzerako orduan gizartean sorrarazten zen eztabaidak ere. Adibide gisa, “maketo” edo “belarri-motz” deiturak arbuiatzea eskatu zuen Beste Euskaldunak izeneko artikuluan, zortzi abizen euskaldun izatea ederra zela aitortu arren, herritar ororentzat berdintasuna eta askatasuna aldarrikatzen baitzituen.

Bi egunez aitaren obra hunkituta irakurtzen egon ostean, “aitaren atxor txiki baina maite hau” ARGIAren esku utzi du Jose Manuel Bujandak. Zinez eskertuta, eta dagokion ardurarekin, zure aitak urteotan zaindu dituen bezain goxo egongo dira ARGIAren artxiboan.