[Itsaso Zubiria Etxeberria] Nekatuta zaude elkarte edo enpresa bati zerbait esan nahian bere webgunera sartu eta harremanetarako posta orokor batera nori zuzentzen ari zaren arrastorik ez duzula mezuak bidaltzeaz? Kaskoan sartu izen hau, irakurle: Ainara Vázquez Martinez. Hemendik aurrera bera izango da ARGIAko harpidedunen eta komunitatearen kontaktu zuzena. Fitxaketa berria.
ARGIAn hasi zaharra ez bada ere, euskalgintzan ibilbide luzea du, Bagera Donostiako Euskaltzaleen Elkartean 23 urte egin baititu lanean. Altzakoa (Gipuzkoa) sortzez, Astigarragan daramatza bi hamarkada. ARGIA-ren Lasarte-Oriako bulegoan aritzen da beharrean eta aitortu badigu ere “oraindik egokitzapen fasean” sentitzen dela, azaldu digu bere eginkizuna “ARGIAko komunitatea zaintzea izango dela, komunitateko kide direnak entzun eta, ahal den neurrian, beraien beharrei erantzutea”. Lanaldi erdiz ari da gaur egun ARGIAn.
Harpidedunarekin gertuko harremana bilatzen du, nahiz eta badakien posta elektronikoz edo telefonoz gertutasun hori transmititzea, sentitzea, zailagoa dela, ahal den neurrian oztopo edo muga horiek arintzea du helburu. “Lehenengo, ordea, lekuan kokatu nahi dut, epe motzean ARGIA ondo ezagutu eta konfiantza irabaztea da asmoa”, azpimarratu du Vázquezek. “Behin hori lortuta, epe ertain-luzera begira, ARGIA proiektua bere osotasunean ezagutzera emanez, proiektua eta komunitatea indartzen laguntzeko ekarpena egin ahal izatea espero dut”, diosku.
Hedabide honek apustua egiten du komunitatearen alde, sinesten du bere talde osoan, erredakziotik etxe bakoitzeraino osatzen dugun ekipoan. ARGIArentzat apustua da langile bat lanaldi erdiz harpidetzetara eta komunitatera jartzea. Baina proiektu berriak ere hortik sortuko dira, oraindik goizegi bada ere zuri, irakurle, ezer zehatzagorik kontatzeko. Baina etorriko dira, ziur.
Hasteko, Ainarak jaso nahiko luke harpidedunen ahotsetik komunitatearen beharrak zeintzuk diren, eta gonbidapena luzatu du: “ARGIAren komunitatea handia da, eta ARGIA, hau osatzen dugun guztion artean egiten dugu. Beraz, irakurle eta harpidedunei beraien beharrak, ekarpen eta proposamenak guri helarazteko askatasuna sentitzeko eskatuko nieke, modu horretara denon artean proiektua hobetu eta indartzeko”.
