Magikoa, sinesgaitzegia agian

Jean-Pierre Jeunetek Amelieren ildotik doan beste film bat egin du, pertsonaia miragarri eta sinesgaitz samarra protagonista duena.

10 urteko haur bat, zientziaren alorreko jenio goiztiarra, familia historia mingarriarekin (anai bat hila bera tartean zegoen istripuan); eta sari bat 400 urtez gelditu gabe biraka aritu daitekeen gurpila asmatzeagatik. Hura jasotzera Montanako etxetik ihes eginda abiatzen denean, familiaz pentsatzeko denbora izango du.
Bitxikeria da filmaren ezaugarri nagusia, nolabaiteko errealismo magikoa, pertsonalki gehiegi erakartzen ez nauena. Pelikulari aitortu behar zaio hiru dimentsioak bikain erabiltzea eta istorio xaloen zaleek gozatuko dute lanarekin seguraski. Niri moñoñoegia iruditu zait.
Lehiaketaz kanpoko film honekin bukatu da Sail Ofiziala aurtengoz. Ea bihar epaimahaiak zer dioen.
SAIL OFIZIALA
The young and prodigious T.S. Spivet
Zuzendaria: Jean Pierre Jeunet.
Aktoreak: Kyle Catlett, Helena Bonham Carter, Callum Keith Rennie, Judy Davis, Robert Maillet, Dominique Pinon.
Frantzia-Kanada.
105 minutu.