Nire komunetik 2010-10-22

Imanol Epelde
0

Ez didazue sinetsiko aste honetan gertatua. Dutxatik atera, eta, ekin diot afeitatzeko apar, kutxila eta afterxeifak hartuta, aurpegiko bixar sakabanatua ebakitzeari. Eta, hasi ez zaizkit ba ispiluan letra eta zenbaki txuri eta berdeak ateratzen, goitik behera, errenkadan, Matrix pelikularen hasiera izango bailitzan.

Gertatua sinetsi ezinik, pentsatu dut ispilua birus batek hartu didala. Nola liteke baina, ispilua birus batek hartzea? Birusak ordenadoreetan sartzen dira, edo gure organismoan, baina ispilu batean? Posible al da ispilu bat birusez kutsatzea? Eta inportanteena, eta badaezpada, ba al dago horretarako antibirusik?

Letra eta zenbaki zuri-berdeen dantzak hipnotizatuta-edo, etorri zaizkit gogora egunkarietako ekonomia orri horixketan agertzen diren grafiko eta burtsako zenbakiak, eta pentsatu dut horrelako zerbait ikusiko zuela Carlos Zapatero Vital Kutxako presidenteak bere ordenadorean. Arabatik laguntza eskatu baitie Kutxa eta BBKri, Estatuan kaudimen handiena duten bi kutxei. Arabakoak ere erosi egin nahi duelako, eta ez erosia izan.

Izan ere, BBK Andaluzian izan da azken hilabeteetan konprak egiten. Andaluziako Cajasur bereganatu zuen orain gutxi Bizkaiko kutxak eta bati bururatzen zaio egin zezakeela beste horrenbeste Arabako kutxarekin, edo iparraldekoekin, hain behera jaitsi gabe.

Aste honetan jakin dugu Euskaltelek erkidegotik kanpora ere lortu ahal izango dituela bezeroak, hala nahiko balu. Eta orain irudikatu sevillako hiritar bat: BBKn hipoteka, Euskaltelen mugikorra eta Guggenheimen kamiseta jantzita. Lehenago gertatuko da hori Andaluzian, Nafarroan baino.

Kontua da finantza erakundeek lasai segi dezaketela monopolira jolasten erosi eta erosi: orain banku bat, orain errepide bat, telefono konpainia bat gero. Total! Hanka sartuz gero Gobernuak izango dituzte laguntzeko! Orain gainera, ez dakit zuek baina, herritar asko kutxetako aurrezkiak ateratzen hasi omen da, eta kezkaturik dabiltza korbatadun zenbait. Beste hiritar batzuk elektrizitate konpainien zorra burtsan erosteko ari da prestatzen: hurrengo astetik aurrera jaulkiko omen dute zorra. Eta ba omen da urrea erosten hasi den herritarrik ere, horixe delako urte honetan aparra bezala hazten ari den bakarra: urrea. Pena bakarra dut nik: aurreko urtean komuna berritua nuenean, iturria eta komuna urrezkoak jarri ez izana, %30a aurreztua izango nuen honezkero!

Urrezko komun baten gainean kronika hauek egiteak zein plazer emango lukeen pentsatzeari utzita, argi dago, gauza batzuetarako beti egongo dela dirua eta asko gainera. Txileko 33 meatzariak lurpetik ateratzeko erabilitako IKT eta inbertsioak erabiliko balituzte Hegoamerikan goseak daudenak laguntzeko, beste ahuntz batek egingo luke puzkarra gauerdian.

Bilboko Supersur saihesbidea egitea ere 24 milioi euro gehiago kostako omen da gutxienez, itxura batean tunel asko egiten ari direlako, eta diotenez, horrek aurreikusi ezin daitezkeen gastuak sortzen dituelako. Erruki ia dena lur azpitik egin asmo duten Abiadura Handiko Trenarekin! Zenbat esan zuten kostatu behar zuela?

Tira, ispiluak kutsatuta-edo, birus ekonomikoak jo nau aste honetan. Frantziako protestek zur eta lur utzi nautelako akaso, edo agian, Zapaterok ekonomia ministerioan egindako aldaketengatik. Edo Otegiri egindako elkarrizketaren ondorioak izango ote dira akaso? Gaurko atxiloketek zein herritan bizi garen gogorarazten digutelako beharbada?

Sendatzeko, beste inolako antibirusik aurkitu ezean, dutxara sartuko naiz berriz, oraingoan dutxa hotz-hotza hartzera. Eta zin dagit. Virusik gabe itzuliko naiz hurrengo astean, birusik gabe eta ispilu berria jarrita, urrezko koadroarekin. Bizi uros!

Utzi erantzuna

Zure e-posta helbidea ez da argitaratuko.

ARGIAko Blogarien Komunitatea - CC-BY-SA