Nire komunetik 101224

Imanol Epelde
0

Ikusi beharko zenukete nola dekoratu dudan gaur nire komuna.

Hona etorri aurreko dutxa beroak ispilua lurrundu duela eta, ZORIONAK erraldoi bat idatzi dut, eta zazpi puntako izar bat marraztu, interruptorea piztu-itzalika sakatzen nuela. Gaurkoa ez baita edozein egun, ezbaita edozein gau.

Nik hala ere nahiago dut Gabonetan baino Eguberrietan gaudela esan, egun berriak datozela pentsatu, aste honetan hasi zaigulako eguna luzatzen eta gaua mozten.

Hori bai. Neguan sartu gara aste honetan, eta izan kontu, ez baita sortu neguari zuztarra moztuko dion xagurik, ez eta negua jaten duen otsorik ere.

Horregatik dagokigu eguzkia gurtzea, bizitzaren jainkoa ohoratzea, eguzkia lozorrotik aterako badugu.

Baina ez. Nola hasiko gara ba eguzkia bezalako dibinidadeak adoratzen, Belenen estalpea edukita, edo, edo… Espainiako loteria edukita. Loteria. Asteazkenean eskaini zitzaion gure Jainko goren eta bakarrari egun osoko diru meza, pastoral doinu monotonoan.

Pentsa! Gure goiko bizilagun guztiek oso altu jarri zuten telebista, igandeko elizkizuna entzuteko baino askoz altuago, miraria noiz gertatuko zain.

Tabernetan ere ez zen beste komentariorik izan. Goiz horretan denek zuten Eibarren familia. Eta periodikotako titularrek letrak numeroekin konfunditzen zituzten.

Gure fedeak, ametsak eta ilusioak zein diren ikusita, inor gutxi harrituko da PISAk gaurko gazteei buruz eman dituen datuak ikusita. Badakizue zer esan duen?

Materialista hutsak dira gure gazteak, gizarte sareetan ia ez dute parte hartzen, ez bada facebooken eta tuentin, atzerriko produktu kulturalak gustatzen zaizkie, eta liburuetan ez bada pantailan, inoiz baino gehiago idazten eta irakurtzen duten arren, inoiz baino interpretazio gaitasun txikiagoa dute.

Gazteak, badakizue. Gazteak eta txoroak. Materialistak. Eta gu ere bai noski. Gu ere gazteak garela esan nahi dut. Eta txoroak. Eta materialistak. %100. Zer eta aste honetan! Pentsa, Olentzero bizarra txukunduta eta alkandora garbiak jantzita ageri zaigu aspaldian, baina mozkortuta segitzen du, eta ez astoa zuhaitzera lotuta tabernaz taberna ardo janean ibiltzen delako, ez Olentzero mozkortu eskaparateetara begira mozkortzen da.

Horregatik ez da inor askorik kezkatuko munduko hizkuntzen egoeraz Unescok aste honetan azaldu dituen datuekin. Hizkuntzak ez baitira ukitzen, erosten, erregalatzen. Kulturak ez baitira zentro komertzialetako kutxazain automatikoetan eskuratzen Visa pasata. Munduan hitz egiten diren 6.700 hizkuntzetatik erdiak mende honetan galtzeko arriskuan daude. Eta gurea, beste bat gehiago baino ez da.

Horregatik, mundu koloretsuagoa aldarrikatzeko aurkeztu da aste honetan hurrengo urteko Korrika. Zer gara gu, nor gara gu betiko galdera existentzialistei erantzunez, geure burua bataiatzeko izen bat dute proposatu: euskalakari. Oraindik xuxenek gorriz azpimarratzen du baina, gure hiztegietara sartuko den termino berria da. Eguzki koloreko hori fosforitoa erantsita.

Gainontzean, zorionak Arkaitz Estiballesi txapelagatik, zorionak Atletiki Bartzelona play stationetik ateratzeagatik, eta Olentzerori, Nafarroako umeei opariak eramatera iritsi den Olentzerori ere bai. Zorionak.

Eta zuei, alboan izateagatik, loteria tokatu zaidan jakiteko, ez dudalako zenbakiekin apustu egiten ibili beharrik. Eguberrion denoi!

Utzi erantzuna

Zure e-posta helbidea ez da argitaratuko. Beharrezko eremuak * markatuta daude

ARGIAko Blogarien Komunitatea - CC-BY-SA