Hitz bi fotosintesiaz

Imanol Epelde
0

Herri guztiek, edo ia guztiek dute bertso eskolaren bat.

Baina bertso eskola gutxik izango dute herri bat.

 

Guk bagenuen,

guk bagenuen Macondo bat

Macondo txiki bat ikastolan

geure neurrira egina

errimez eraikia

argudioz dekoratua.

Bagenuen Macondo txiki eta kantari bat.

 

Eta gaur, handik 25 urtera hitza hartu badut

Bertsoainen* erroldatuta egon nintzelako da,

bertako plazetan egin nuelako jolas,

esaterako,

esaterako Jon Sarasua izatera.

Mahonezko galtzak, pisamierdasak eta AEKko jertsea jantzita.

 

Gaur, 25 urtera hitza hartu badut

zuregatik da Rosa,

zuregatik da Pello.

Eta zuregatik ere bai, ama.

Zuk animatu eta bultzatu ninduzun,

lapazorriak askatu

eta

bertso eskolara.

Rosaren eta Pelloren bertso eskolara.

Rosaren, Pelloren eta bertan egin nituen lagun guztien bertso eskolara,

bertso herrira.

 

Astean behin elkartzen ginen Bertsoaingo plazara.

Eta han ikasiak baliagarriagoak izan zaizkit

logaritmoak

eta EGAko atariko frogak

eta fotosintesiak baino.

 

Zuena bai fotosintesia!

 

Eta zenbat lore pilatu zenituzten aurrekoan egindako omenaldi afarian!

Ez daitezela denbora baino lehen lehortu!

Loreak eta gauza politak publikoan eta publikoan bakarrik botatzeko ohitura

inuzentea baitaukagu…

 

Ridikuluak gara.

Oso ridikuluak.

Batek lasai asko pasa dezake bizi osoa

inguruan zenbat estimatzen

eta maitatzen duten

enteratu gabe

harik eta hamarreko nagusi bat kantatzen dioten arte.

 

Ridikulak gara.

Ridikuluak gara eta biluztu egingo naiz,

niregan esker onez beteta zaudetela esateko

eta Etxe Beltz bertso eskola gaur ere hainbeste gazterekin ikusteak

ilusioz betetzen nauela esateko.

 

Errimarik gabe esan dut dena. Eta neurririk gabe.

Baina ezaguna zaizue doinua, ezta?

 

download┬áMilesker Pello Esnal, Rosa Lertxundi! Eta inguruan ibili zineten I├▒aki Zulaika, Joxean Elola…

Bizitza luzea Etxebeltz bertso eskolari!

 

*Hala izena zuen Pello Esnalek bertso eskolarako sortutako herri imaginarioak

Utzi erantzuna

Zure e-posta helbidea ez da argitaratuko. Beharrezko eremuak * markatuta daude

ARGIAko Blogarien Komunitatea - CC-BY-SA