Konplizitatea

Atalak: musika kritika

Fitxa: Euskadiko Orkestra Sinfonikoa. Zuzendaria: Carlo Rizzi. Bakarlaria: Frank Peter Zimmermann (biolina). Egitaraua: Sibelius-en obrak. Lekua: Gasteizko Principal Antzokia. Data: urtarrilaren 30a.

Ze sentsazio atsegina, kontzertu batean, taula gainean dauden kide guztien arteko giro ona nabaritzen denean. Hori antzeman eta entzun egiten da. Azken batean, musika ‘bibrazioz’ osatzen da, eta interpretatzerakoan norberak duen umorea edo erosotasuna (edo deserosotasuna) musikan agertzen da.

Ba, Euskadiko Orkestrak eskainitako seigarren abono-kontzertuan halako adiskidetasuna eta giro konplizea nabaritu genituen, eta horrek relax berezi bat sortarazten du entzulegoan. Frank Peter Zimmermann biolin jolea dexente aldiz izan da gure artean, eta bereziki Euskadiko Orkestrarekin. Elkar ezagutzen dute eta, beraz, Sibelius-en ‘Re minorreko biolin eta orkestrarako op. 47 kontzertua’ distiratsua atera zen. Benetan zaila da obra hau, batez ere hirugarren mugimendua ‘Allegro ma non tanto’, baina Zimmermann-ek aisetasunez gainditu zituen zailtasun guztiak, estilo handiz. Konpaktazioa orkestrarekin, bestalde, primerakoa.

Eta saioaren bigarren zatian, Sibelius izan genuen berriz ere, baina aldi honetan bere ‘5. Sinfonia op. 82 mi bemol maiorrekoa’. Obra distiratsu eta adoretsua da, eta zinez orijinala. Carlo Rizzi zuzendariak jakin zuen ematen behar den indarra eta aldi berean ñabardura soinuari. Oso saio atsegina, beraz.