Mascletá

Atalak: musika kritika

Fitxa: Musika Hamabostaldia. Euskadiko Orkestra Sinfonikoa. Bilboko Orkestra Sinfonikoa. Zuzendaria: Victor Pablo Pérez. Donostiako Orfeoia. Zuzendaria: J.A. Sainz Alfaro. Iruñako Orfeoia. Zuzendaria: Igor Ijurra. Easo Eskolania. Araoz Gazte Abesbatza. Zuzendaria: Gorka Miranda. Bakarlariak: Christian Elsner (tenorea), Thomas Ospital (organoa). Egitaraua: Berlioz, Madina eta Sorozabal-en obrak. Lekua: Kursaal Auditorioa. Data: abuztuaren 31a.

Ematen du Musika Hamabostaldia bezalako jaialdi bat fuerte eta sendo amaitu behar dela. Halaxe izan zen aurtengoaren bukaera. Totala. Bi orkestra, bi helduen abesbatza eta beste bi umeen abesbatza. Lareun lagun baino gehiago taula gainean. Soinu-bolumen ikaragarria. Benetan ikusgarria, baina beste eremu batzuetan gertatzen den bezala, askotan ikusgarritasuna eta kalitate fina ez doaz eskutik. Saio hau balekoa izan zen, dudarik gabe, baina norbaitek benetako maila altua espero bazuen, ikuskizuna ez zen horretara iritsi. Euskadiko Orkestra Sinfonikoak eta Bilboko Orkestra Sinfonikoak ahaleginak egin zituzten soinu ona ateratzeko eta lortu zuten interpretazio nahiko orekatua egiten.

Berlioz-en ‘Te Deum op.22’ lan handiaren irakurketa dotorea egin zuen Victor Pablo Pérez zuzendariak, nahiko planoa momento batzuetan, baina adierazkorra orokorrean. Donostiako Orfeoia eta Iruñako Orfeoia txukun aritu ziren baina pena izan zen umeen abesbatzak, Easo Eskolania eta Araoz Gazte Abesbatza hain zuzen ere, nahiko estalita geratu zirela, distirarik gabe, hain handia zen besteen bolumena.

Une politenetako bat Madina-ren ‘Aita Gurea’ izan zen, fin eta izpiritualtasunez betea. Javier Sánchez gaztetxoa bakarlari gisa aritu zen, eta ahots benetan polit eta afinatua erakutsi zuen.

Jarraian, Sorozabal-en ‘Gernika’ lan irmo eta hunkigarria amaiera aproposa izan zen kontzertu efektista eta zaratatsu batentzat. Datorren urte arte.