Mesia, urteroko tradizioa

Atalak: musika kritika

Fitxa: Excelentia Fundazioa-k antolatutako Händel-en ‘Mesia’. Santa Zezilia Orkestra Klasikoa. Donostiako Orfeoia. Zuzendaria: José Antonio Sainz Alfaro. Bakarlariak: Víctor Sordo (tenorea), María Hinojosa (sopranoa), Pau Bordás (baritonoa), Marta Infante (mezzoa). Lekua: Kursaal Auditorioa. Data: abenduaren 22a.

Gabonetan, badaude hainbat gauza saihestezinak, turroiak bezala, eta horietako bat, dudarik gabe, Händel-en ‘Mesia’ programatzea da. Agian pentsa daiteke oratorio hau Eguberritan interpretatzeko konposatu zela, baina hori ez da egia. Izan ere, lan honek ez du bakarrik kontatzen Jesus-en jaiotza, bere bizitza osoa baizik. Baina, nahiz eta horrela izan, denok lotzen dugu maisulan hau garai honekin eta, egia esan, entzungo ez bagenu egun hauetan Aleluia famatua zeozer faltan botako genuke.

Beraz, aurten ere tradizioa jarraitu da, eta aukera izan dugu ‘Mesia’ entzuteko Kursaal Auditorioan. Bertsio argitsu eta adoretsua izan genuen Donostiako Orfeoiaren eta Santa Zezilia Orkestra Klasikoaren eskutik, José Antonio Sainz Alfaro-ren batutapean.

Orkestra doia izan genuen, nahiko segurua, nahiz eta delikadezi gutxikoa, dena esan behar da. Eskerrak Orfeoiak bere onena eman zuela, eta honek orekatu zuen inpresio orokorra. Orfeoikoek jakin izan zuten fraseaketa ongi zaintzen, detaile txikietan, arnasa ondo kudeatuz eta pasarte bakoitzaren giroa primeran irudikatuz.

Oratorio honetan, bakarlarien lana abesbatzaren menpean dago, baina azpimarratu behar da lau abeslarien kantu garbi eta zaindua. María Hinojosa sopranoa distiraz aritu zen erregistro agudoan batez ere. Marta Infante mezzoa oso adierazkorra suertatu zen bere arietan, Victor Sordo tenorea bezala, eta azpimarragarria izan zen Pau Bordás baritonoaren interpretazioa, ahots-kolore egokia eta malgutasuna koloratureetan erakutsi baitzituen.

Bis bat eskini zuten. Zein? Aleluia, noski!