Organoaren hasiera bikaina

Atalak: musika kritika

Fitxa: Musika Hamabostaldia. Organo Zikloa. Loreto Fernández Imaz (organoa), Ainhoa Zubillaga (mezzoa). Egitaraua: Couperin, Fauré, Vierne, Chausson, Messiaen, Hahn, Langlais, Aita Donostia, Pildain, Sorozabal eta Guridiren lanak. Lekua: Donostiako San Bizente eliza. Data: abuztuaren 4a.

Kosta ahala kosta, Musika Hamabostaldiaren 81. edizioa hementxe dugu, eta, oraingoz, pozak ematen dizkigu. Organo zikloaren hasiera izan zen horietako bat. Loreto Fernandez Imaz organistak eta Ainhoa Zubillaga mezzoak lehen topaketa hau, San Bizente elizan, benetako pozez beteriko unea izatea eragin zuten.

Ohitu egin behar dugu eserlekuen arteko banaketa bitxi horretara, maskara itogarrietara, kontrol zorrotzera, dena da emanaldi musikal baten gozamenaren apur bat kontrakoa, baina nahasmendu horiek gorabehera, musika onaren atseginean murgildu gaitezke, eta halaxe izan zen kasu honetan.

Saioak organo solo-rako obrak eta Ainhoa Zubillagaren ahotsaren kolore polita azpimarratzen zuten obrak tartekatu zituen. Ainhoaren ahotsaren berotasuna distira berezia izan zuen elizaren akustikan. Hauxe izan zen errrezitaldiaren ezaugarri nabarmena.

Loreto Fernández Imaz organo joleak bere abilezia eta gustu musikal fina adierazi zituen une guztietan. François Couperin-en ‘Offertoire sur les grands jeux’ obrarekin ireki zuen emanaldia eta hasiera-hasieratik garbi utzi zuen organoaren errekurtso guztiak menderatzen dituela. Azpimarratu behar ditugu Olivier Messiaen-en ‘Joie et clarté des corps glorieux’ izeneko piezaren interpretazioa, eta Joaquín Pindain-en ‘Elegia’, biak ederki jota.

Esan bezala, Ainhoa Zubillagak protagonismo izugarria izan zuen saio honetan. Gabriel Faureren ‘Rêve d’ amour’ eta ‘Après un rêve’ kantuek, Reynaldo Hahnen ‘L’heure exquise’ kantuak bezala, oso interpretazio ederra izan zuten.

Hala ere, beharbada unerik distiratsuena Jesus Guridiren abestien interpretazioa izan zen. ‘Haritz Adarrean’ eta ‘Hala Baita’ abestiak,  mezzoak mimatu zituen bokalki, eta organo-joleak ere ezinhobeki lagundu zituen.

Bis bat oparitu zuten, ‘Aurtxo polita’ kanta ezaguna, gozo-gozoa.